एजेन्सी – युइएफए च्याम्पियन्स लिगको प्रि–क्वाटरफाइनलको पहिलो लेगमा आज स्पेनिस क्लब रियल म्याड्रिडले इंग्लिस क्लब म्यानचेस्टर सिटीको आतिथ्यता गर्दैछ । खेल रियलको मैदान सान्टियागो बर्नबेउमा बुधबार राति १ः४५ बजेपछि हुनेछ ।

रियाल र सिटी २०१७ पछि पहिलोपटक खेल्न लागेका हुन् । यि दुई टोलीले २०१७ मा प्रि सिजनको च्याम्पियन्स लिगमा खेलेका थिए । रियल घरेलु मैदानमा हुने खेलमा जित निकाल्दै क्वाटरफाइनलको यात्रालाई बलियो बनाउने लक्ष्यमा हुनेछ । पछिल्लो दुई खेलमा जित निकाल्न नसकेको च्याम्पियन्स लिगको सर्वाधिक सफल रियल सिटीलाई पराजित गर्दै जितको लय पक्रने दाँउमा हुनेछ ।

रियल ला लिगाको पछिल्लो खेलमा सेल्टा डि भिगोसँग २–२ गोलको बराबरीमा रोकिदा लेभान्टेसँग १–० ले स्तब्ध बनेको थियो । चोटबाट पुनरागमन गरेको बेल्जियन इडेन हजार्ड पुन: चोटग्रस्त बन्दा रियल समस्या परेको छ । हजार्डले लेभान्टेसँगको खेलमा चोट बोकेका थिए । रियलका प्रशिक्षक जिनेदिन जिदानले हजार्डले यो सिजन गुमाउन सक्ने बताएको छ ।

हजार्डविना पनि रियलले सिटीलाई पराजित गर्ने क्षमता राख्दछ । ग्यारेथ बेलले चोटबाट पूनरागमन गरेका छन् । बेलसँगै करिम बेन्जेमा, इस्को, क्यासमिरो, टोनी क्रुस, फेडरिको भालभेर्डे, कप्तान सर्जियो रामोस, फरल्यान्ड मेन्डी, राफयल भरान र ड्यानियल कार्भाहलको रियललाई साथ छ । यससँगै रियालसँग युवा स्टार रोड्रिगो र भिनिसियस जुनियरको पनि साथ छ ।

यता, घरेलु मैदानमा रियाललाई स्तब्ध पार्दै म्यानेचस्टर सिटी क्वाटर फाइनल प्रवेशको सम्भावना बलियो बनाउने दाउमा हुनेछ । पछिल्लो दुई खेलमा शत प्रतिशत जित निकालेको सिटी सोही प्रदर्शनलाई रियालविरुद्ध निरन्तरता दिँदै जित निकाल्ने दाउमा हुनेछ । रहिम स्टरलिङले चोटका कारण रियलविरुद्धको खेल गुमाउनेछन् । सर्जियो अगुइरोले सिटीको अग्रपङ्ति सम्हाल्नेछन् । उनलाई रियाद महारेज र बर्नाडो सिल्भाले साथ दिनेछन् । डेभिड सिल्भा, केभिन डि ब्रुयन, रोड्री र फर्नाडिन्होको साथ सिटीलाई रहनेछ ।

रियलले पछिल्लो पाँच खेलमा २ जित, १ बराबरी र २ हारको नतिजा निकालेको छ । यता सिटीले पछिल्लो पाँच खेलमा ३ जित र दुई हारको नतिजा निकालेको छ । पछिल्लो नतिजा हेर्दा रियाल र सिटीबीचको खेल रोमाञ्चक हुने अपेक्षा गरिएको छ । यि दुई टोलीबीचको पछिल्लो ६ खेलमा रियल हावी भएको छ । रियलले ३ खेलमा जित हात पार्दा दुई बराबरी र १ हारको नतिजा निकालेको छ । पछिल्लो खेलमा सिटीले रियललाई ४–१ ले पराजित गरेको थियो ।