काठमाडौं (हाम्रो खेलकुद) – एएफसी महिला एसियन कप–२०२२ छनोटको हङकङविरुद्धको खेलमा नेपालको सुरुवाती ११ घोषणा भएको छ । फिलिपिन्सविरुद्धको पहिलो रोजाईमा खेलेको भन्दा टोलीमा एक खेलाडी परिवर्तन भएको छ ।

डिफेन्डर पुजा रानाको स्थानमा बिमला बिकले पहिलो रोजाईमा मौका पाएका छन् । पुजाले फिलिपिन्सविरुद्धको खेलमा चोट बोक्न पुगेकी थिइन् । उनको स्थानमा बिमलाले नै राष्ट्रिय टोलीबाट डेब्यु गरेकी थिइन् । नेपालको गोलपोस्ट एन्जिला तुम्बाप्पो सुब्वाले सम्हालेछिन् ।

डिफेन्समा गीता राना, हीरा कुमारी भुजेल, अमृता जैशी र बिमला विक रहनेछिन् । मिडफिल्डमा कप्तान रेनुका नगरकोटेसँगै मन्जली कुमारी योन्जन र सरु लिम्बु रहनेछन् । फरवार्डमा प्रीति राईसँगै सविता राना र बिमला चौधरी रहनेछन् । बिमलाले फिलिपिन्सविरुद्धको खेलमा गोल गरेकी थिइन् ।

खेल उज्वेकिस्तानस्थित (जेएआर एसओके) माजमुएसी स्टेडियममा नेपाली समयअनुसार दिउँसो ३ः४५ बजे हुनेछ । समूह ‘एफ’ को पहिलो खेलमा फिलिपन्ससँग अग्रता लिनका बावजुत अन्तिम समयमा दुई गोल खान पुग्दा नेपालले २–१ को हार भोगेको थियो । उक्त खेलमा भएको गल्तीलाई सच्याउँदै नेपाले छनोटमा हङकङलाई हराउने लक्ष्यमा हुनेछ ।

नेपालले हङकङसँग दुई खेल खेल्दा दुवै खेलमा हार बेहोरेको छ । नेपालले हङकङसँग सन् १९८६ मा १–० ले तथा सन् १९८९ मा ३–० को हार बेहोरेको थियो । त्यसयता यि दुई टोली पहिलोपटक खेल्न लागेको हो । सन् २०१८ मा भने हङकङको राष्ट्रिय टोलीलाई नेपाल एपिएफको महिला टोलीले ३–१ को जित निकालेको थियो । महिला टोली पनि एपिएफले निकालेको जितलाई निरन्तरता दिदै हङकङमाथि पहिलो जित निकाल्ने लक्ष्यमा हुनेछ ।

यस समूहको फिलिपिन्स र हङकङबीचको ८ असोजमा हुनेछ । समूहको शीर्ष टोलीले अर्को वर्ष भारतमा हुने एसियन कप खेल्नेछ । नेपाललाई छनोट हुन कम्तीमा पनि जितको खाँचो छ । एसियन कप जनवरी २० देखि फेब्रुअरी ६ सम्म हुनेछ ।

समूह विजेता सोझै एसियन कपको लागि छनोट हुने प्रावधान छ । एसियन कप छनोट भए नेपाल विश्वकप छनोटमा पनि अघि बढ्नेछ । एएफसीले विश्वकप छनोट हुने प्रक्रियाबारे प्रष्ट पारेको छैन, तर एसियन कपकै नतिजाले विश्वकपमा छनोट हुने भने उल्लेख गरिएको छ । एसियन कपमा छनोट भएमात्र विश्वकप छनोटमा अघि बढ्न सकिने पनि प्रष्ट छ ।