एजेन्सी – युइएफए युरोपा लिगमा इंग्लिस क्लब लेस्टर सिटीले सहज जित निकालेको छ । लेस्टरले घरेलु मैदानमा पोलिस क्लब लेगिया वार्सजावामाथि ३–१ को जित निकालेको हो ।

लेस्टरको जितमा पाटसन डाका, जेम्स म्याडिसन र विलफ्रेड एनडिडिलीले गोल गरे । फिलिप म्लाडिनोभिचले एक गोल फर्काए । सबै चार गोल पहिलो हाफमा नै सम्भव भएको थियो ।

किङ पावर स्टेडियममा बिहीबार राति भएको खेलमा घरेलु टोलीले खेलको ११औं मिनेटमा पाटसन डाकाको गोलबाट अग्रता लिएको थियो । उनले हार्भे बार्नेसको पासमा गोल गरेका थिए । २१औं मिनेटमा जेम्स म्याडिसनले गोल गर्दै लेस्टरको अग्रता दोब्बर पारे ।

२६औं मिनेटमा माहिर इमरेलीले पेनाल्टी चुकाउँदा लेगिया वार्सजावाले गोल अन्तर कम गर्न सकेन । लगत्तै २७औं मिनेटमा फिलिप म्लाडिनोभिचले माहिरको पासमा गोल गर्दै खेललाई २–१ को अवस्थामा ल्याए ।

३३औं मिनेटमा विलफ्रेड एनडिडिले गोल गर्दै लेस्टरलाई पहिलो हाफमा ३–१ को अग्रता दिलाए । उनले जेम्स म्याडिसनको पासमा गोल गरेका थिए । दोस्रो हाफमा दुवै टोलीबाट कुनै गोल निस्कन नसक्दा पहिलो हाफको नतिजा नै लेस्टरको जितमा पर्याप्त बन्यो ।

जितपछि लेस्टर समूह ‘सी’ मा ५ खेलबाट ८ अंक जोडेर शीर्षस्थानमा उक्लिएको छ । पराजित लेगिवा वार्सजावा ६ अंक जोडेर पुछारमा छ । यो समूहबाट सबै चार टोलीको नकआउट चरण पुग्ने सम्भावना रहेको छ ।

दोस्रो स्थानको स्पारटाक मस्को र तेस्रो स्थानको नेपोलीको समान ७ अंक छ । समूहको अन्तिम चरणको खेलमा लेस्टर र नेपोली तथा स्पारटाक मस्को र लेगिया वार्सजावाबीच प्रतिस्पर्धा हुदैछ ।