एजेन्सी – पोर्चुगिज फरवार्ड डिएगो जोटाको दुई गोल मद्दतमा मर्सिसाइड क्लब लिभरपुलले इंग्लिस प्रिमियर लिगमा सानदार जित दर्ता गरेको छ । लिभरपुलले घरेलु मैदानमा साउथह्याम्टनलाई ४–० को भारी अन्तरले पराजित गरेको हो ।

लिभरपुलको जितमा थियागो अलकान्तारा र भर्जिल भान डाइकले समान एक गोल थपे । एनफिल्डमा शनिबार राति भएको खेलको दोस्रो मिनेटमा नै डिएगो जोटाको गोलबाट लिभरपुलले अग्रता लिएको थियो । उनले एन्ड्रिउ रोबर्टसनको पासमा गोल गरेका थिए । ३२औं मिनेटमा जोटाले अर्काे गोल थप्दै लिभरपुलको अग्रता दोब्बर पारे । यसपटक जोटाले मोहम्मद सलाहको पासमा गोल गरेका थिए ।

३७औं मिनेटमा थियागो अलकान्ताराले गोल गरेपछि लिभरपुलले पहिलो हाफमा ३–० को अग्रता लिन सफल भयो । ५२औं मिनेटमा भर्जिल भान डाइकले गोल गर्दै लिभरपुललाई ४–० ले अघि बढाए । भान डाइकले ट्रेन्ट एलेक्सान्डर अर्नाेल्डको पासमा गोल गरेका थिए । त्यसपछि थप गोल निस्कन नसक्दा लिभरपुल विजयी हुन सफल भयो ।

यो जितसँगै लिभरपुल १३ खेलबाट २८ अंक जोडेर दोस्रो स्थानमा उक्लिएको छ । लिभरपुलले एक खेल कम खेलेको म्यानचेस्टर सिटीलाई २ अंकले पछि पार्दा शीर्षस्थानको चेल्सीसँगको अंक् दुरी १ मा छोट्याएको छ । पराजित साउथह्याम्टन १४ अंक जोडेर १४औं स्थानमा रहेको छ ।