एजेन्सी – स्पेनिस ला लिगामा क्याटलान क्लब बार्सिलोनाले भिल्लारियललाई उसकै मैदानमा पराजित गरेको छ । बार्सिलोनाले भिल्लारियलाथि ३–१ को सहज जित हात पारेको हो ।

भिल्लारियलमा शनिबार राति भएको खेलमा बार्सिलोनाको सहज जितमा फ्रान्की डि जोङ, मेम्फिस डिपाए र फिलिपे कौटिन्होले गोल गरे । घरेलु टोलीका स्यामुइल चुकविइजीले एक गोल फर्काए ।

घरेलु मैदानमा भिल्लारियलले बार्सिलोनालाई पहिलो हाफमा बराबरीमा रोकेपनि दोस्रो हाफमा रोक्न सकेन । ४८औं मिनेटमा फ्रान्की डि जोङले गोल गर्दै बार्सिलोनालाई सुरुवाती अग्रता दिलाए । ७६औं मिनेटमा स्यामइल चुकविइजीले एर्नाउट डानजुमाको पासमा गोल गर्दै खेललाई १–१ गोलको बराबरीमा ल्याए ।

८८औं मिनेटमा मेम्फिस डिपाएले गोल गर्दै बार्सिलोनालाई २–१ को अग्रता दिलाए । इन्ज्युरी समयको थप गरिएको चौथो मिनेटमा वैकल्पिक खेलाडी फिलिपे कौटिन्होले पेनाल्टीमा गोल गर्दै बार्सिलोनालाई सहज जित दिलाए । ला लिगामा बार्सिलोनाको यो पहिलो अवे जित हो । यसअघि बार्सिलोनाले अवे मैदानमा ३ बराबरी र २ हारको नतिजा निकालेको थियो ।

जितपछि बार्सिलोना १४ खेलबाट २३ अंक जोडेर सातौ स्थानमा यथावत रहेको छ । बार्सिलोना शीर्षस्थानमा रहेको एक खेल कम खेलेको रियल म्याड्रिडसँग ६ अंकले पछि छ । पराजित भिल्लारियल १६ अंक जोडेर १२औं स्थानमा रहेको छ ।