एजेन्सी – फरवार्ड करिम बेन्जेमा र भिनिसियस जुनियरको गोल मद्दतमा स्पेनिस ला लिगाको शीर्षस्थानमा रहेको रियल म्याड्रिडले पूनरागमन जित निकालेको छ । घरेलु मैदानमा रियलले सेभियालाई २–१ ले पराजित गरेको हो ।

सान्टियागो बर्नबेउमा आइतबार राति भएको खेलमा राफा मिरको गोल सान्त्वना बन्यो । उनले खेलको १२औं मिनेटमा मार्काेस एकुनाको पासमा गोल गर्दै सेभियालाई सुरुवाती अग्रता दिलाएका थिए । १४औं मिनेटमा राफा मिरको प्रहारलाई डेभिड अलाबाले गोललाइनबाट क्लियर गर्दै रियलको संकट टारे ।

३१औं मिनेटमा लुकास ओकम्पासको प्रहार क्रसबारमा लाग्दै बाहिरिदा सेभिया अग्रता दोब्बर पार्नबाट चुक्यो । ३२औं मिनेटमा करिम बेन्जेमाले गोल गर्दै खेललाई १–१ गोलको बराबरीमा ल्याए । काउन्टर अट्याकमा इडर मिलिसाओको झन्डै ३० यार्ड टाढाको प्रहारलाई गोलरक्षक यासिन बोनोउले नियन्त्रणमा लिन नसकेको बललाई रिवाउन्डमा बेन्जेमाले खाली पोस्टमा गोल गरे ।

४५औं मिनेटमा मार्काे एसेन्सियोको प्रहार क्रसबारबाट थोरै बाहिरिदा रियल अग्रता लिनबाट चुक्यो । ८४औं मिनेटमा टोनी क्रुसको फ्रिकिकमा डेभिड अलाबाको १८ यार्ड टाढाको भली प्रहार क्रसबारबाट बाहिरियो । ८७औं मिनेटमा दुई ब्राजिली इडर मिलिसाओ र भिनिसियसको समन्वयमा बनेको मुभमा भिनिले गोल गर्दै रियललाई पूनरागमन जित दिलाए ।

यो जितसँगै शीर्षस्थानमा रहेको रियलको १४ खेलबाट ३३ अंक पुगेको छ । रियलले दोस्रो स्थानको एट्लेटिको म्याड्रिडलाई ४ अंकले पछि पारेको छ । पराजित सेभियाले दोस्रो स्थानमा उक्लने मौका गुमाउँदा २८ अंक जोडेर शीर्ष चारमा रहेको छ ।