एजेन्सी – इंग्लिस क्लब म्यानचेस्टर युनाइटेडमा राल्फ राङ्गनिक अन्तरिम प्रशिक्षकमा नियुक्त भएपछि उनले टिमलाई सन्तुलन बनाउने योजना बुनिसकेका छन् ।

क्लबले खेलाडी सरुवा बजारमा टोलीलाई सन्तुलनमा राख्ने प्रयास गरिरहेको छ । जर्मनीका ६३ वर्षीय राल्फले म्यानचेस्टर युनाइटेडको आक्रमण सुधार गर्न एर्लिङ ब्राउट हालान्ड र टिमो वेर्नर प्राथमिकतामा राखेका छन् । राङ्गनिकले युनाइटेडको अग्रपङ्तिमा क्रिस्टियानो रोनाल्डोसँगै हालान्ड र वेर्नरलाई थप्न चाहेका हुन् ।

जर्मनीको प्रतिष्ठित पत्रिका विल्डका अनुसार दुई फरवार्ड हालान्ड र वेर्नरबारे उनलाई राम्ररी थाहा छ । हालान्डलाई आरबी साल्जवर्गमा उनै राङ्निकले आबद्ध गराउन महत्वपुर्ण भुमिका निभाएका थिए । त्यसैले म्यानचेस्टर युनाइटेडलाई आशा छ कि हालान्डलाई यो समरमा राङ्गनिकले अनुबन्ध गर्न सक्नेछ । हालान्डको मुल्य ११८ मिलियन युरो रहेको छ ।

लाइप्जिगका पुर्व प्रशिक्षक राङ्गनिकले प्रिमियर लिग प्रतिद्धन्द्धी चेल्सीका फरवार्ड टिमो वेर्नरलाई अनुबन्ध गर्न केही कठिन हुन सक्नेछ । तर, वेर्नरले चेल्सीमा आफ्नो प्रभाव जमाउन सकेका छैनन् । यदि म्यानचेस्ट युनाइटेडले हालान्ड र वेर्नर दुवैलाई युनाइटेडमा अनुबन्ध गरेको अवस्थामा क्लबमा रहेका केही खेलाडीलाई बिदा गर्नुपर्ने हुन्छ । किनकि युनाइटेडमा फरवार्डको थुप्रै विकल्प रहेको छ ।

एडिन्सन काभानी, मार्कस रासफोर्ड, मेसन ग्रीनवुड, एन्थोनी मार्सियालमध्ये केही खेलाडीलाई बेच्ने वा लोनमा पठाउन सक्नेछ । यो निश्चित छ कि म्यानचेस्टर युनाइटेडमा यो समरसँगै धेरै गतिविधि हुने पक्का छ ।