एजेन्सी – दक्षिण कोरियाली फरवार्ड ह्युङ मिन सनले एक गोलसँगै अर्काे गोलको लागि असिस्ट दिएपछि इंग्लिस प्रिमियर लिगमा टोटेनहम हटस्परले सहज जित निकालेको छ ।

टोटेनहमले घरेलु मैदानमा नर्विच सिटीमाथि ३–० को सहज जित आत्मसात गरेको हो । घरेलु टोलीको जितमा लुकास मोउरा, डाभिन्सन सान्चेज र ह्युङ मिन सनले गोल गरे ।

टोटेनहम हटस्पर स्टेडियममा आइतबार राति भएको खेलको १०औं मिनेटमा लुकास मोउराको गोलबाट टोटेनहमले अग्रता लिएको थियो । उनले ह्युङ मिन सनको पासलाई सदुपयोग गरेका थिए ।

६७औं मिनेटमा डाभिन्सन सान्चेजले गोल गर्दै टोटेनहमको अग्रता दोब्बर पारे । कर्नरबाट आएको बल डिफ्लेक्ट हुँदा सान्चेजले सिक्स यार्ड बक्सबाट सहज गोल गरेका थिए । ७७औं मिनेटमा ह्युङ मिन सनले गोल गर्दै टोलीको सहज जित पक्का गरे । उनले बेन डेभिसको पासा गोल गरेका थिए ।

जितसँगै टोटेनहम १४ खेलबाट २५ अंक जोडेर पाँचौ स्थानमा रहेको छ । पराजित नर्विच सिटी १० अंक जोडेर पुछारमा रहेको छ ।

अर्काे खेलमा सुरुवाती अग्रता लिनका बावजुत लेस्टर सिटीले एस्टन भिल्लासँग २–१ को हार बेहोरेको छ । भिल्लाको जितमा इजरी कोन्साले दुवै गोल गरे । लेस्टरका हार्भे बार्नेसले एक गोल फर्काए ।

यो जितसँगै भिल्ला १९ अंक जोडेर १०औं स्थानमा रहेको छ । समान १९ अंक नै रहेपनि लेस्टर हेड टु हेडमा पछि पर्दै ११औं स्थानमा रहेको छ ।