एजेन्सी – इंग्लिस क्लब टोटेनहम हटस्परको सिनियर ६ खेलाडीलाई कोरोना संक्रमण पुष्टि भएको छ । बेलायती संचारमध्यमका अनुसार टोटेनहमको सिनियर टोलीका ६ खेलाडी र दुई जना स्टाफलाई कोरोनो सक्रमण पुष्टि भएको बताइएको छ ।

सिनियर टोलीकै ६ खेलाडीलाई कोरोना पुष्टि भएपछि टोटेनहमलाई थप समस्या सिर्जना भएको छ । खेलाडीको नाम भने खुलाइएको छैन । खेलाडीहरु कम्तीमा १० दिन आइसोलेसनमा बस्नुपर्ने भएपछि उनीहरुले यसै साता युरोपा कन्फ्रेस लिगमा रेनेस र प्रिमियर लिगमा ब्राइटनसँगको खेल गुमाउने पक्का छ । टोटेनहमले यो अवधिमा कारवाओ कप एफए कपमा पनि प्रतिस्पर्धा गर्दैछ ।

संक्रमण देखिएका खेलाडी तथा अफिसियलले पुन: पिसिआर परिक्षण गर्नेछन् । पुन: नतिजा पोजेटिभ नतिजा आए उनीहरु कम्तीमा १० दिन आइसोलेसनमा बस्नुपर्नेछ । नेगेटिभ आएको खण्डमा उनी टोलीमा उपलब्ध हुनेछन् ।

नयाँ प्रशिक्षक एन्टेनियो कोन्टे प्रशिक्षणमा आएयता टोलीले उच्च प्रदर्शन गरिरहेको छ । टोटेनहम प्रिमियर लिगको पाँचौ स्थानमा रहेको छ । टोटेनहम शीर्ष चारको वेस्टह्याम भन्दा २ अंकले पछि छ । अत्यधिक हिमपातका कारण बर्नलेसँग गत नोभेम्बर २८ मा हुनुपर्ने खेल स्थगित भएको थियो ।

पछिल्लो समय प्रिमियर लिगका टोलीमा कोरोना देखिएको यो पहिलोपटक होइन । यसअघि म्यानचेस्टर सिटीका चार खेलाडीलाई कोरोना देखिएको थियो ।