एजेन्सी – जर्मन बुन्डेसलिगाको शीर्षस्थानमा रहेको बायर्न म्युनिखले जित निकाल्दा दोस्रो स्थानमा रहेको बोरुसिया डर्टमुन्डले बराबरीको नतिजा निकालेको छ ।

घरेलु मैदानमा बायर्नले माइन्जमाथि २–१ को पूनरागमन जित निकालेको हो । बायर्नको पुनरागमन जितमा किङ्सले कोमान र जमल मुसिएलाले गोल गरे । माइन्जका करिम ओनिसिओले एक गोल गरे ।

एलिएन्ज एरिना म्युनिखमा शनिबार राति भएको खेलको २२औं मिनेटमा करिम ओनिसिओको गोलबाट माइन्जले घरेलु टोलीविरुद्ध अग्रता लिएको थियो । एक गोलले पछि परेको बायर्नले त्यसपछि माइन्जलाई दवावमा राखेपनि दोस्रो हाफमा मात्रै बराबरी गोल फर्काउन सफल भयो ।

५३औं मिनेटमा किङ्सले कोमानले गोल गर्दै खेललाई १–१ गोलको बराबरीमा लयाए । उनले कोरिन्टिन टोलिसोको पासमा गोल गरेका थिए । ७४आं मिनेटमा जमल मुसिएलाले बेन्जामिन पाभर्डको पासमा गोल गर्दै बायर्नको जित पक्का गरे ।

यो जितसँगै शीर्षस्थानमा रहेको बायर्नको १५ खेलबाट ३७ अंक पुगेको छ । बायर्नले दोस्रो स्थानको बोरुयिा डर्टमुन्डलाई ६ अंकले पछि पारेको छ । डर्टमुन्डको समान खेलबाट ३१ अंक छ । पराजित माइन्ज २१ अंक जोडेर आठौं स्थानमा रहेको छ ।

अर्काे खेलमा डर्टमुन्डले घरेलु टोली बोचुमसँग १–१ गोलको बराबरी खेल्दै अंक बाँडेको छ । खेलको अन्त्यतिर जुलियन ब्रान्ड्टले गोल गर्दै डर्टमुन्डलाई हारबाट जोगाएका हुन् । त्यसअघि ४०औं मिनेटमा सेवास्टिएन पोल्टेरको गोलबाट बोचुमले अग्रता लिएको थियो ।

५४औं मिनेटमा डर्टमुन्डका मारिअस वल्फले गोल गरेपनि भिएआरबाट मान्यता पाएन । यो बराबरीसँगै दोस्रो स्थानको डर्टमुन्डको १५ खेलबाट ३१ अंक पुगेको छ । बोचुम २० अंक जोडेर १०औं स्थानमा रहेको छ ।

अर्काे खेलमा आरबी लाइप्जिगले बोरुसिया मोन्चेनग्लाडवाकलाई ४–१ को फराकिलो गोल अन्तरले पराजित गरेको छ । लाइप्जिगको जितमा जोस्को जिभराडिओ, आन्द्रे सिल्भा, क्रिस्टोफोर एनकुुकु र बेन्जामिन हेनरिचले गोल गर्दा मोन्चेनग्लाडवाकका रामी बेन्सेवेइनीले एक गोल फर्काए ।