काठमाडौं (हाम्रो खेलकुद) – काठमाडौं विश्वविद्यालय धुलिखेलले नेपाल आइस राष्ट्रव्यापी धुलिखेल मेयर कप फुटबल प्रतियोगिता २०७८ मा विजयी सुरुवात गरेको छ ।

आइतबार भएको उद्घाटन खेलमा भक्तपुरको एफसी रिअलेलाई टाइब्रेकरमा ४-२ ले पराजित गर्दै केयू अर्को चरणमा पुगेको हो । निर्धारित समयको खेल २-२ को बराबरीमा सकिएपछि खेलको निर्णय टाइब्रेकरमा लिइएको थियो । टाइब्रेकरमा केयूका गोलरक्षक सौगात खत्रीले उत्कृष्ट प्रदर्शन गर्दै टोलीलाई जित दिलाए । उनी खेलको प्लेयर अफ द म्याच बने ।

काठमाडौं विश्वविधालयका लागि अमित तिमल्सिनाले १३ औं मिनेटमा गोल गर्दै सुरुवाती अग्रता दिलाए । एफसी रिअलेका लागि २० औं मिनेटमा उमेश खड्काले बराबरी गोल गरे । ४० औं मिनेटमा रोहन खड्काले गोल गरेपछि रिअले २-१ ले अघि बढ्यो । तर अभिषेक श्रेष्ठले ७१ औं मिनेटमा बराबरी गोल गर्दै खेल टाइब्रेकरमा पुर्याए ।

प्रतियोगितामा १९ टोलीको सहभागिता रहेको छ । विजेता टोलीले २ लाख रुपैयाँ प्राप्त गर्दा उपविजेता टोलीले १ लाख पाउनेछ । विधागत उत्कृष्टतर्फ हरेक खेलाडीले ५ हजार रुपैयाँ पाउनेछन् । प्रतियोगिताको अनुमानित बजेट १० लाख रुपैयाँ रहेको छ ।

प्रतियोगिताको आयोजक आकाश भैरव क्लबले धुलिखेल नगरपालिकासँग सहकार्यमा प्रतियोगिता आयोजना गरेको हो । सिजी ब्रुअरीको नेपाल आइसले मुख्य प्रायोजन गरेको छ । प्रतियोगिताको सबै खेल धुलिखेलको सामुदायिक खेल मैदानमा हुनेछ ।