एजेन्सी – फ्रान्सेली गोलरक्षक ह्युगो लोरिसले इंग्लिस क्लब टोटेनहम हटस्परसँग थप दुई वर्षको सम्झौता नविकरण गरेका छन् । टोटेनहमबाट बाहिरिने चर्चा चलिरहँदा उनले क्लबसँग दुई वर्षको सम्झौता नविकरण गरेका हुन् ।

यो सम्झौतासँगै टोटेनहमका समेत कप्तान रहेका ३५ वर्षीय गोलरक्षक सन् २०२४ को जुनसम्म टोटेनहममा रहनेछन् । उनको पुरानो सम्झौता यो सिजनको अन्त्यसम्म रहेको थियो ।

लोरिसको सम्झौता लम्ब्याउने निर्णय प्रशिक्षक एन्टोनियो कोन्टेका लागि ठुलो प्रोत्साहनको रुपमा रहने छ । लोरिस यो सिजनको अन्त्यसँगै फ्रान्स फर्कने अपेक्षा गरिएको थियो । टोटेनहम अर्काे सिजनदेखि नयाँ गोलरक्षककै खोजीमा रहेको थियो । तर, कोन्टेको आगमनले लोरिसले क्लबसँग थप दुई सिजनका लागि सम्झौता थप्न राजी भएको बुझिएको छ । लोरिसलाई क्लबमै राख्न प्रशिक्षक कोन्टेको ठुलो भुमिका रहयो ।

लोरिस सन् २०१२ मा लियोनबाट उत्तरी लन्डन क्लबमा आबद्ध भएका थिए । उनी टोटेनहममा एक दशक खेल्ने संघारमा रहेका छन् । सन् २०१८ मा फ्रान्सले विश्वकपको उपाधि जित्दाका पहिलो रोजाईका गोलरक्षक रहेका लोरिसले टोटेनहमका लागि ३९५ खेल खेलेका छन् । प्रिमियर लिगको ३१८ खेलमा उनले ११२ क्लिन सिट राखेका छन् ।