एजेन्सी – एसियाली पावरहाउस अष्ट्रेलिया र जापानले फिफा विश्वकप कतार २०२२ अन्तरगतको एसियाली छनोटको तेस्रो राउन्डमा सानदार जित निकालेका छन् ।

अष्ट्रेलियाले घरेलु मैदानमा भिएतनामलाई ४–० को भारी अन्तरले पराजित गरेको हो । अष्ट्रेलियाको जितमा जेमी म्याकलरेन, टोम रोजिक, क्रेइग गुडविन र रिले म्याकग्रीले गोल गरे । एमी पार्क मेलवर्नमा बिहीबार भएको एकपक्षीय खेलमा घरेलु टोली अष्ट्रेलियाले खेलको ३०औं मिनेटमा जेमी म्याकलरेनको गोलबाट अग्रता लिएको थियो । पहिलो हाफको इन्ज्युरी समयको थप गरिएको दोस्रो मिनेटमा टोम रोजिकले गोल गर्दै घरेलु टोलीको अग्रता दोब्बर पारे ।

७२औं मिनेटमा क्रेइग गुडविनले गोल गर्दै अष्ट्रेलियालाई ३–० ले अघि बढाए । ७७औं मिनेटमा राइली म्याकग्रीले गोल गर्दै घरेलु टोलीको फराकिलो जित सुनिश्चित गरे । जितसँगै अष्ट्रेलिया समूह ‘बी’ मा ७ खेलबाट १४ अंक जोडेर तेस्रो स्थानमा रहेको छ । पराजित भियतनाम अंकविहीन हुँदै पुछारमा छ ।

सोही समुहको अर्काे खेलमा जापानले चीनलाई २–० ले पराजित गरेको छ । साइतामा स्टेडियममा घरेलु टोली जापानको जितमा युया ओसाको र जुन्या इटोले गोल गरे । पहिलो र दोस्रो हाफमा समान एक गोल भएको थियो ।

जितसँगै जापान ७ खेलबाट १५ अंक जोडेर दोस्रो स्थानमा यथावत रहेको छ । पराजित चीन ५ अंक जोडेर पाँचौ स्थानमा रहेको छ । यो समूहमा साउदी अरेबिया ६ खेलबाट १६ अंक जोडेर शीर्षस्थानमा रहँदा ओमान ६ खेलबाटै ७ अंक जोडेर चौथो स्थानमा रहेको छ ।