निजगढ (हाम्रो खेलकुद) – नेपाल खेलकुद क्लब, रौतहटले निजगढ मेयर गोल्डकप फुटबल प्रतियोगिताको उपाधि जितेको छ । नवजनजागृति युवा क्लब सिमरा बारालाई शनिबार ३—१ ले पराजित गर्दै खेलकुद क्लबले चौथो संस्करणको निजगढ मेयर गोल्डकप जितेको हो ।

खेलकुद क्लबका म्याक्सवेलले ११ औ मिनेटमा गोल गर्दै शुरुवाती अग्रता दिलाएका थिए । खेल अवधिभरी नवजनजागृतिमाथि हावी रहेको खेलकुद क्लबका लागि ३५ औ मिनेटमा फोडे फोफनाले गोल गर्दै अग्रता दोब्बर बनाए । ४२ औ मिनेटमा फोफनाले नै गोल गरेपछि पहिलो हाफमै ३—० को अग्रता लिएको थियो ।

दोस्रो हाफमा पनि केहि सृजना गरेको खेलकुद क्लब गोल गर्न भने सफल भएन । नवजनजागृतिकोलागि खेलको ईन्ज्युरी समयमा टोनिस सिनो हाङले एक गोल फर्काए । खेकलदु क्लबले उपाधिसहित १ लाख ५० हजार रुपैंया र नव जनजागृतिले ७५ रुपैंया प्राप्त गर्यो । निजगढका मेयर सुरेश कुमार खनालले विजेता उपविजेता टोलीका खेलाडीलाई पुरस्कृत गरे ।

रौतहटका फोफना फाइनलका म्यान अफ दी म्याच घोषित भए र उनले २ हजार रुपैयाँ प्राप् तगरे । निजगढका रविन बस्नेत उत्कृष्ट गोलकिपर, नवजनजागृतिका सागर चौलागाई उत्कृष्ट रक्षक , खेलकुद क्लबका रोशन पुरी उत्कृष्ट मिडफिल्डर, सोही क्लबका म्याक्सवेल उत्कृष्ट फवार्ड र निजगढका संजित धामी उदयीमान खेलाडी घोषित भए । उत्कृष्टले समान ५ हजार रुपैयाँ प्राप्त गरे ।

निजगढ युवा क्लबको आयोजना र निजगढ फुटबल क्लबको सह आयोजना रहेको प्रतियोगितालाई निजगढ नगरपालिका मुख्य सहयोगी रहेको थियो ।