काठमाडौं (हाम्रो खेलकुद) – सरस्वती युथ क्लबमाथि पूनरागमन जित निकाल्दै रानी पोखरी कर्नर टिम (आरसिटी) ले शीर्ष डिभिजनमा बढुवा हुने सम्भावना बलियो बनाएको छ ।

सहिद स्मारक ‘बी’ डिभिजन लिग अन्तरगत मंगलबार भएको खेलमा आरसिटीले सरस्वती क्लबमाथि २–१ को पूनरागमन जित निकालेको हो । आरसिटीको पूनरागमन जितमा अमर डंगोल र अमृत गुरुङले गोल गरे । सरस्वतीका लागि विक्रम विशुंखेले एक गोल फर्काए ।

सातदोबाटोस्थित एन्फा कम्प्लेक्सको खेल मैदानमा आरसिटी खेलको १०औं मिनेटमा विक्रम विशुंखेको गोलबाट पछि परेको थियो । २५औं मिनेटमा कप्तान अमर डंगोलले गोल गर्दै खेललाई १–१ गोलको बराबरीमा ल्याए । त्यसपछि निर्धारित समयको खेल सकिन एक मिनेट बाँकी रहँदा अमृत गुरुङले गोल गर्दै आरसिटीलाई २–१ को पूनरागमन जित दिलाए ।

यो जितसँगै दोस्रो स्थानमा रहेको आरसिटीको १२ खेलबाट २१ अंक पुगेको छ । अब खुमलटार युथ क्लबले अंक गुमाएको अवस्थामा आरसिटी एक खेल बाँकी छँदै शीर्ष डिभिजनमा बढुवा हुनेछ । खुमलटारले बुधबार नयाँ वस्ती युथ क्लबसँग खेल्दैछ । खुमलटारको १० खेलबाट १६ अंक रहेको छ ।

आरसिटीसँगको हारसँगै सरस्वतीको यो सिजन शीर्ष डिभिजनमा उक्लने सम्भावना सकिएको छ । तेस्रो स्थानमा रहेको सरस्वतीको १२ खेलबाट १७ अंक रहेको छ ।

चर्च ब्वाइज युनाइटेड लिगको एक खेल बाँकी छँदै ‘बी’ डिभिजन च्याम्पियन बन्दै शीर्ष डिभिजनमा उक्लिसकेको छ । १२औं चरणको खेलमा चर्च ब्वाइजले बाँसबारी क्लबमाथि ५–१ को फराकिलो जित निकालेको छ । चर्च ब्वाइजको जितमा साइमन लिम्बुले ह्याट्रिकसहित चार गोल गरे । एक गोल आशिष चौधरीको नाममा रह्यो । बाँसबारीमा सन्जोक धिमालले एक गोल फर्काए ।

शीर्षस्थानमा रहेको चर्च ब्वाइजको १२ खेलबाट २६ अंक पुगेको छ । चर्च ब्वाइजले १२ खेलमा ८ जित र समान दुई बराबरी र हारको नतिजा निकालेको छ । २०६६ सालमा स्थपित चर्च ब्वाइज स्थापनाको १३ वर्षमै शीर्ष डिभिजनमा बढुवा हुन सफल भएको हो ।

चर्च ब्वाइजले २०७६ र २०७७ मा ‘सी’ डिभिजन छनोट खेलेको थियो । ‘बी’ डिभिजन खेलेको पहिलो सिजन नै चर्च ब्वाइज च्याम्पियन बन्दै शीर्ष डिभिजनमा बढुवा हुन सफल भएको हो । चर्च ब्वाइजले ‘सी’ डिभिजन खेल्नुअघि मोफसलका विभिन्न प्रतियोगिताहरु खेल्दा ३० भन्दा बढी उपाधि जित्न सफल भएको थियो ।

लिगकै अर्काे खेलमा श्री कुमारी क्लबले श्री भगवती क्लब टोखालाई ३–१ ले गरेको छ । श्री कुमारीको जितमा निर बहादुर आले, श्रीजन राज गौतम र राज भुषालले गोल गरे । श्री भगवतीका अनुज भण्डारीले एक गोल गरे ।

यो जितसँगै श्री कुमारी १२ खेलबाट १६ अंक जोडेर सातौ स्थानमा उक्लिएको छ । पराजित श्री भगवती १२ खेलबाट १५ अंक जोडेर नवौं स्थानमा रहेको छ ।