काठमाडौं (हाम्रो खेलकुद) – लिग च्याम्पियन मछिन्द्र घरेलु मैदानमा श्रीलंकाको ब्लु स्टार एससीसँग हार बेहोर्दै एएफसी कप छनोटको प्रारम्भिक चरणबाटै बाहिरियो । मंगलबार दशरथ रंगशालामा २-१ ले पराजित भएपछि मछिन्द्रको अन्तर्राष्ट्रिय सहभागिता पहिलो खेलमा नै टुंगिएको हो ।

त्रिपुरेश्वरस्थित दशरथ रंगशालामा मंगलबार भएको खेलमा ब्लु स्टारको जितमा मोहमेद इसान र सेनाल सन्देशले गोल गरे । दुवै गोल पहिलो हाफको मध्यतिर भएको थियो । मछिन्द्रका कप्तान सुजल श्रेष्ठले इन्ज्युरी समयमा एक गोल फर्काएपनि सो गोल सान्त्वना मै सिमित बन्यो ।

खेलपछि बोल्दै मछिन्द्रका प्रशिक्षक प्रवेश कटुवालले पाएको अवसर सदुपयोग गर्न नसक्दा हार बेहोरेको बताए । ‘हामीले पाएको अवसर सदुपयोग गर्न सकेनौं । त्यसैको परिणामस्वरूप हार बेहोर्नु पर्यो,’ खेलबारे उनले भने, ‘हामीले विपक्षी खेलाडीबारे अध्ययन गरेका थियौं । नम्बर ९ सर्वाधिक गोलकर्ता भएको र नम्बर १० ले छिटो फ्रिकिक चलाउने गरेको बताएको थिएँ । खेलाडीलाई हाइ अलर्ट बस्न भनेपनि त्यहि गर्न नसक्दा गोल खान पुग्यौं ।’

प्रशिक्षक कटुवालले खेलका लागि आफूले सबैभन्दा बलियो सुरुवाती एघार नै उतारेको बताए । ‘हामीले आफ्नो बलियो सुरुवाती ११ नै उतारेका हौं । सुनिल बललाई लिएर केहि दुविधा थियो । उनले पनि पछिल्लो ५-६ दिन देखि प्रशिक्षण गरेका थिए । हामीले फिजियो सुरज भुषालसँग सल्लाह गरेर नै उनलाई सुरुवातमा खेलाउने निर्णय गरेका हौं,’ कटुवालले थपे ।

प्रशिक्षक कटुवालले अजरबैजानका विंगर नुर्लान नोभ्रुजोभले भने अपेक्षित प्रदर्शन गर्न नसकेको स्पष्ट पारे । ‘पक्कैपनि लिगमा पनि नुर्लानको प्रदर्शन खड्केको थियो । आज पनि ५ यार्डबाट पाएको अवसरमा पनि गोल गर्न सकेनन् । त्यस्तो सहज अवसर सदुपयोग गर्न नसक्दा पराजय भोग्नु नै पर्छ,’ उनले भने ।

‘हामीले विदेशी खेलाडी पनि परिवर्तन गर्न खोजेका थियौं । तर त्यसो गर्न पाइएन,’ उनले भने, ‘नेपाल सुपर लिगका कारण पनि विदेशी खेलाडी हामीले अनुबन्ध गर्न पाएनौं । गोल गर्ने क्षमता भएका विदेशी फरवार्ड नेपालमै थिए । तर एनएसएल हुने नहुने दुविधा हुँदा हामीले अनुबन्ध गर्न असमर्थ रह्यौं,’ कटुवालले थपे ।

प्रशिक्षक कटुवालले एनएसएलका कारण अन्य कुनै असर भने नपरेको बताए । उनले मोफसलका प्रतियोगितामा एएफसीलाई ध्यानमा राख्दै चोट नलाग्ने तरिकाले खेलेको र त्यसले नतिजामा केहि असर परेको जानकारी दिए ।