एजेन्सी – इंग्लिस प्रिमियर लिगमा लन्डन क्लब चेल्सीले सानदार जित निकालेको छ । चेल्सीले साउथह्याम्टनमाथि उसकै मैदानमा ६–० को सानदार जित निकालेको हो ।

सेन्ट मेरिज स्टेडियम साउथह्याम्टनमा शनिबार राति भएको खेलमा चेल्सीको फराकिलो जितमा मासन माउन्ट र टिमो वेर्नरले समान दुई तथा मार्काेस अलन्सो र कार्ए हाभर्टजले समान एक गोल गरे । पहिलो हाफमा चार तथा दोस्रो हाफमा दुई गोल सम्भव भएको थियो ।

खेलको आठौं मिनेटमा मार्काेस अलन्सोको गोलबाट चेल्सीले खेलमा गोलको खाता खोलेको थियो । यो श्रृंखला ५४औं मिनेटसम्म रह्यो । अलन्सोले मासन माउन्टको पासमा गोल गरेका थिए । १६औं मिनेटमा मासन माउन्टले गोल गर्दै चेल्सीको अग्रता दोब्बर पारे ।

२१औं मिनेटमा टिमो वेर्नरले गोल गर्दै चेल्सीलाई खेलमा ३–० ले अघि बढाए । ४१औं मिनेटमा काई हाभर्टजले गोल गदै चेल्सीलाई पहिलो हाफमा ४–० को आरामदायी अग्रता दिलाए । ४९औं मिनेटमा टिमो वेर्नरले व्यक्तिगत दोस्रो तथा टोलीका लागि पाँचौ गोल गर्दै चेल्सीलाई फराकिलो जिततर्फ अग्रसर गराए । त्यसपछि ५४औं मिनेटमा मासन माउन्टले व्यक्तिगत दोस्रो तथा टोलीका लागि छैटौं गोल गर्दै चेल्सीलाई फराकिलो जित दिलाए ।

सानदार जितसँगै चेल्सीले शीर्ष चारमा आफ्नो पकड बलियो बनाउँदा ३० खेलबाट ६२ अंक जोडेर तेस्रो स्थानमा यथावत रहेको छ । चेल्सी शीर्षस्थाननको म्यानचेस्टर सिटीसँग १३ तथा लिभरपुलसँग १२ अंकले पछि रहँदा चौथो स्थानको टोटेनहमभन्दा ८ अंकले अघि छ । पराजित साउथह्याम्टन ३१ खेलबाट ३६ अंक जोडेर १३औं स्थानमा रहेको छ ।