एजेन्सी – स्कटिस क्लब रेन्जर्स, इंग्लिस क्लब वेस्ट ह्याम युनाइटेड र जर्मन क्लब युरोपा लिगको सेमिफाइनलमा प्रवेश गर्दा बार्सिलोना बाहिरिएको छ ।

रेन्जर्सले ९ खेलाडीमा समेटिएको पोर्चुगिज क्लब ब्रागालाई दोस्रो लेगमा अतिरिक्त समयमा ३–१ ले तथा समग्रमा ३–२ ले पराजित गर्दै सेमिफाइनलमा स्थान पक्का गरेको हो ।

आइब्रक्स स्टेडियम ग्लास्गोमा बिहीबार राति भएको खेलमा घरेलु टोली रेन्जर्सले खेलको दोस्रो मिनेटमा नै जेम्स टाभेर्निएरको गोलबाट अग्रता लिएको थियो । पाँचौ मिनेटमा केमार रुफीको गोलले मान्यता पाएन ।

४२औं मिनेटमा भिटोर टोरमेना सिधै रातो कार्ड खाँदै मैदानबाट बाहिरिएपछि ब्रागा समस्यामा पर्दा त्यसको फाइदा रेन्जर्सले उठाउन सफल भयो । त्यसमै प्राप्त पेनाल्टीमा जेम्सले गोल गर्दै रेन्जर्सको अग्रता दोब्बर पारे । ८३औं मिनेटमा डेभिड कार्माेले गोल गरेपछि समग्रमा २–२ गोलको बराबरीमा पुग्दा खेल अतिरिक्त समयमा लम्बियो ।

१०१औं मिनेटमा केमार रुफीले गोल गर्दै रेन्जर्सलाई ३–१ ले अघि बढाए । १०५औं मिनेटमा लुरी मेडेइरोस दोहोरो पहेँलो कार्ड खाँदै मैदानबाट बाहिरिएपछि ब्रागा ९ खेलाडीमा समेटिन पुग्यो । त्यसपछि थप गोल निस्कन नसक्दा रेन्जर्स विजयी हुन सफल भयो ।

अर्काे खेलमा आरबी लाइप्जिगले इटाली क्लब एटलान्टासँग दोस्रो लेगमा २–० ले तथा समग्रमा ३–१ को जित निकाल्दै सेमिफाइनलमा पुग्न सफल भयो । दोस्रो लेगमा लाइप्जिगको जितमा क्रिस्टोफोर एनकुुकुले १८औं र ८७औं मिनेटमा गोल गर्दै सहज जित पक्का गरे । पहिलो लेग १–१ गोलको बराबरीमा सकिएको थियो ।

यस्तै वेस्ट ह्याम युनाइटेडले फ्रान्सेली क्लब लियोनमाथि ३–० को तथा समग्रमा ४–१ को जित निकाल्दै अन्तिम चारमा स्थान बनाउन सफल भयो । पहिलो लेग १–१ गोलको बराबरीमा सकिएको थियो ।

दोस्रो लेगमा वेस्टह्यामको सहज जितमा क्रेइग डासन, डिक्लन राइस र जरोड वोवेनले गोल गरे । ३८औं मिनेटमा क्रेइग डासनले गोल गर्दै वेस्ट ह्यामलाई १–० को अग्रता दिलाए । ४४औं मिनेटमा डिक्लनले गोल गर्दै अग्रता दोब्बर पारे । ४८औं मिनेटमा जरोड वोवेनले गोल गर्दै टोलीको जित पक्का गरे ।

अर्काे खेलमा क्याटलान क्लब बार्सिलोना घरेलु मैदानमा आइनट्राख्ट फ्रान्कफुर्टसँग ३–२ ले तथा समग्रमा ४–३ ले पराजित हुँदै बाहिरिएको छ ।

योसँगै युरोपा लिगको सेमिफाइनल समिकरण पुरा भएको छ । अब सेमिफाइनलमा वेस्ट ह्याम र फ्रान्कफुर्ट तथा रेन्जर्स र लाइप्जिगबीच प्रतिस्पर्धा हुनेछ । सेमिफाइनलको पहिलो लेग २८ अप्रिलमा तथा दोस्रो लेग ५ मेमा हुनेछ । फाइनल १८ मेमा हुनेछ ।