धनगढी (हाम्रो खेलकुद) – विभागीय त्रिभुवन आर्मी फुटबल क्लब कैलालीको धनगढीमा जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको सेमिफाइनलमा प्रवेश गरेको छ ।

धनगढी रंगशालामा आइतबार साँझ भएको खेलमा बागमति युवा क्लबलाई ७–० ले हराउँदै आर्मी अन्तिम चारमा स्थान पक्का गरेको हो ।आर्मीको फराकिलो जितमा कुसुम खतिवडा र अमिषा कार्कीले समान दुई तथा इन्दिरा राई र दीपा शाहीले समान एक गोल गरिन् । एक गोल उपहार पाएको थियो ।

अधिकांश समय बल आफ्नो कब्जामा राखेको आर्मीले पहिलो हाफमा चार गोल गर्यो भने दोस्रो हाफमा तीन गोल थप्यो । १७औं मिनेटमा ईन्दिरा राई, २८औं मिनेटमा सुस्मिता तामाङको आत्मघाती गोल, २९औं मिनेटमा अमिषा कार्की र ३९औं मिनेटमा दीपा शाहीले गोल गर्दा आर्मी पहिलो हाफमा ४–० ले अघि बढ्यो ।

दोस्रो हाफमा आर्मीले तीन गोल थप्दा कुसुम खतिवडाले ४९औं र ६०औं मिनेटमा गोल गरिन् । ९०औं मिनेटमा अमिषाले गोल गर्दै आर्मीको फराकिलो जि तपक्का गरिन् । अब आर्मीले सेमिफाईनलमा नेपाल एपिएफ क्लब र विराटनगर महानगरपालिका बीचको विजेतासँग खेल्नेछ ।

वनदेवी युवा क्लबको आयोजनमा भईरहेको प्रतियोगिता अन्तर्गत शनिबार भएको उद्घाटन खेलमा जित हात पार्दै विभागीय टीम नेपाल पुलिस क्लब सेमिफाईनल पुगिसकेको छ । समुह ए मा रहेको पुलिसले सेमफाईनलमा आयोजक वनदेवी युवा क्लब र कालिका स्पोर्टस एकेडेमी चितवनको विजेतासँग खेल्नेछ ।

सोमबार विभागीय टीम नेपाल एपिएफ क्लब र विराटनगर महानगरपालिका प्रतिस्पर्धा गर्नेछन् ।