एजेन्सी – इन्ज्युरी समयमा यान्निक कारास्कोले पेनाल्टीमार्फत गोल गरेपछि एट्लेटिको म्याड्रिडले स्पेनिस ला लिगामा महत्वपूर्ण जित निकालेको छ ।

१० खेलाडीमा समेटिएको एट्लेटिकोले स्पान्योलमाथि २–१ को जित निकालेको हो । वान्डा मेट्रो पोलिटानोमा आइतबार भएको खेलमा घरेलु टोलीको जितमा दुवै गोल यान्निक कारास्कोले गर्दा स्पान्योलका राहुल दि थोमसले एक गोल फर्काए ।

प्रतिस्पर्धात्मक खेलको ५२औं मिनेटमा कारास्कोको गोलबाट घरेलु टोलीले सुरुवाती अग्रता लिएको थियो । उनले म्याथिअस कुन्हाको पासमा गोल गर्न सफल भएका थिए ।

७१औं मिनेटमा जियोफ्रे कोन्डोगविया दोहोरो पहेलो कार्ड खाँदै मैदानबाट बाहिरिएपछि एट्लेटिको समस्यामा परेको थियो । डार्डेरको २५ यार्डको प्रहारलाई बचाउने क्रममा जियोफ्रे कोन्डोगविया हातले बल छुन पुगेपछि रेफ्रीले दोहोरो पहेलो कार्ड देखाएका थिए । त्यसमै प्राप्त फ्रिकिकमा राहुल दि थोमसले गोल गर्दै खेललाई १–१ गोलको बराबरीमा ल्याए ।

त्यसपछि बराबरीतर्फ धकेलिएको खेलको अन्तिम समयमा पाएको पेनाल्टीलाई यान्निक कारास्कोले गोल गर्दै एट्लेटिकोलाई महत्वपूर्ण जित दिलाए । राहुल दि थोमसले हातले बल छुन पुगेपछि रेफ्रीले भिएआरको सहायता लिदै एट्लेटिकोलाई पेनाल्टी प्रदान गरेको थियो ।

यो जितसँगै एट्लेटिकोले दोस्रो स्थानको बार्सिलोना र तेस्रो स्थानको सेभियासँगको अंक बराबरी गरेको छ । तीन टोलीको समान ६० अंक रहेको छ । बार्सिलोनाले दुई तथा सेभियाले एक खेल कम खेलेको छ । स्पान्योल ३९ अंक जोडेर ११औं स्थानमा रहेको छ ।