एजेन्सी – हेरी केन टोटेनहम मै बस्ने सम्भावन बलियो भउको छ । म्यानचेस्टर सिटीले इर्लिङ हालान्डसँगको सम्झौता गरिसकेको दाबीसँगै केनले टोटेहममै रहने मनसाय बनाएको बताइएको छ । हालान्डसँगको सम्झौताले नै इग्ल्यान्डका कप्तान समेत रहेका केन अर्को सिजन सिटीमा जाने सम्भावना कम भएको हो । टाइम्सका अनुसार अर्को सिजनमा पनि केन सोही क्लबमा निरन्तर रहनेछन् ।

अहिले प्रिमियर लिगको चौथो स्थानमा रहेको स्पर्सले अर्को सिजन च्याम्पियन्स लिग खेल्ने सम्भावनालाई बलियो बनाउँदै लगेको छ । त्यसकारण पनि केन टोटेनहम बस्ने सम्भावना बलियो बन्दै गएको छ । २९ वर्षे फरवार्डको अझै दुई वर्ष क्लबसँग सम्झौता रहेको छ ।
म्यानचेस्टर युनाइटेड पनि उनका लागि अर्को विकल्प हुन सक्थ्यो ।

तर प्रशिक्षक माउरिसियो पोचेटिनो युनाइटेड गएको अवस्थामा त्यो सम्भावना बढ्न सक्थ्यो । केन इग्ल्यान्ड छाडेर अन्य देश जाने सम्भावना पनि कम छ । कारण उनी प्रिमियर लिगमा एलान सेसेरको सर्वाधिक गोलकर्ताको कीर्तिमान भंग गर्न चाहन्छन् । प्रिमियर लिगको सर्वाधिक गोलकर्ताको सुचीमा अहिले केन १ सय ७८ गोलका साथ पाँचौं स्थानमा छन् ।

टोटेनहमको इतिहासमा पनि सर्वाधिक गोलकर्ता बन्ने सम्भावना पनि उनीसँग छ । उनले टोलीका लागि २ सय ४३ गोल गरिसकेका छन् । जिमी ग्रेभ्सले क्लबका लागि सर्वाधिक २ सय ६६ गोल गरेका छन् ।

टोटेनहमको लक्ष्य
टोटेनहमले सेन्टर मिडफिल्डलाई बलियो बनाउने लक्ष्यका साथ ब्रेन्टफोर्डबाट क्रिस्टियन इरिक्सन र लेस्टर सिटीबाट योरी टेलेमेन्सलाई भित्राउन चाहिरहेको छ । इरिक्सनको सम्झौता जारी सिजनको अन्त्यसम्म रहेको छ ।

डेनिस मिडफिल्डले सन् २०१३ देखि २०२० सम्म टोटेनहमबाट खेलेका थिए । २०१९ मा टोली च्याम्पियन्स लिगको फाइनल पुग्दा इरिक्सन त्यसका सदस्य थिए । टेलेमेन्सको लेस्टरसँग २०२३ सम्म सम्झौता गरेका छ । यद्दपी क्लबले २५ मिलियन पाउन्डमा उनलाई विक्री गर्न चाहिरहेको जनाएको छ ।