पोखरा (हाम्रो खेलकुद)– कास्की जिल्ला फुटबल संघको अध्यक्षमा उज्ज्वल रन्जित विजयी भएका छन् । कास्कीको बुधबार भएको निर्वाचनअन्तर्गत दोस्रो चरणको मतदानमा उज्ज्वल रन्जितले १४ मत ल्याउँदै विजयी भए । उनका प्रतिद्वन्द्वी विनोद गुरुङको ७ मत मात्रै रह्यो भने १ मत बदर हुन पुग्यो ।

अध्यक्ष पद बाहेक सबै पदमा सर्वसम्मत भएको हो । अध्यक्षका लागि विनोद गुरुङ, उज्ज्वल रन्जित र नवीन पुनले उम्मेदवारी दिएका थिए ।
२२ मत रहेको कास्कीमा नविन पुनले ५ मत मात्र प्राप्त गरे । यस्तै विनोद गुरुङले ७ मत प्राप्त गर्दा उज्ज्वल रन्जितले ९ मत प्राप्त गर्दा १ मत भने कसैलाई नहाल्दा बदर हुन पुग्यो ।

एन्फा विधान अनुरुप विजेताले कुल मतको ५० प्रतिशत मत ल्याउनुपर्ने व्यवस्था भएपनि कुनैपनी उम्मेदवारले ५० प्रतिशत मत नल्याउँदा रन्जित र गुरुङबीच पुनः मतदान भएको थियो । उपाध्यक्षमा पाँच जनाले आकांक्षा देखाए पनि विष्णु कुमार गुरुङ र खेमराज बरालले उम्मेदवारी फिर्ता लिएसँगै उपाध्यक्षमा समेत सर्वसम्मत भएको हो । उपाध्यक्षमा जगत बहादुर थापा,नरप्रसाद गुरुङ र सुरेन गुरुङ सर्वसम्मत भए ।

सदस्यहरुमा सुनिल गायक, शोभा बानियाँ, राजेश त्रिपाठी, सन्तोष कार्की, विकास गुरुङ, योगेश गुरुङ, हितमान गुरुङ, विकास गुरुङ, सुविन श्रेष्ठ, ओम गुरुङ र टंकप्रसाद गुरुङ सर्वसम्मत भएको निर्वाचन अधिकृत केशव राज बरालले जानकारी दिए । निर्वाचित पदाधिकारीको सपथ ग्रहण समेत भएको छ ।