एजेन्सी – युइएफए च्याम्पियन्स लिगको सेमिफाइनलको पहिलो लेगको दोस्रो खेलमा आज बुधबार (राति) इंग्लिस क्लब लिभरपुलले घरेलु मैदानमा स्पेनिस क्लब भिल्लारियलको आतिथ्यता गर्दैछ ।

खेल एनफिल्डमा नेपाली समयअनुसार राति १२ः४५ बजेपछि हुनेछ । घरेलु मैदानमा भिल्लारियलविरुद्ध मैदान उत्रँदा लिभरपुल यो सिजन चार उपाधिको यात्रालाई कायम राख्ने लक्ष्यमा हुनेछ ।

लिग कपको उपाधि जितिसकेको लिभरपुल एफए कपको फाइनलमा तथा प्रिमियर लिगको उपाधि दौडमै रहेको छ । यस्तो लिभरपुललाई भिल्लारियलविरुद्धको खेल निकै महत्वपूर्ण छ ।

योर्गेन क्लोपको प्रशिक्षणमा तेस्रो पटक फाइलनको लक्ष्य बनाएको लिभरपुलसँग मोहम्मद सलाह, साडियो माने, लुइस डियाज, डिएगो जोटा, थियागो अलकान्तरा, फाविन्हो, जोर्डन हेन्डरसन, एन्ड्रिउ रोबर्टसन, भर्जिल भान डाइक, ट्रेन्ट एलेक्सान्डर आर्नाेल्ड र गोलरक्षक एलिसन बेकर टोलीमा रहेका छन् । चोटका कारण रोबर्टाे फिर्मिनो टोलीमा हुनेछैनन् ।

यता, प्रि–क्वाटरफाइनलमा युभेन्ट्स र क्वाटरफाइलनमा जर्मन महारथी बायर्न म्युनिखलाई हराएर ‘जायन्ट किलर’ छवि बनाएको भिल्लारियल १६ वर्षपछि च्याम्पियन्स लिगको सेमिफाइनलमा पुगेर हौसिएको भिल्लारियल लिभरपुलविरुद्ध पनि सोही प्रदर्शनलाई निरन्तरता दिदै फाइनलमा पुग्ने लक्ष्यमा हुनेछ ।

मुख्य प्रशिक्षक युनाइ एम्री गत सिजनको युरोपा लिग विजेता भिल्लारियललाई पहिलोपटक च्याम्पियन्स लिगको फाइनलमा पु¥याउने लक्ष्यमा हुनेछ । टोलीका मुख्य फरवार्ड जेरार्ड मोरेनो र अल्बर्टाे मोरेनोको चोट भिल्लारियललाई महँगो पर्न सक्नेछ ।

तर, टोलीसँग अर्नाउट डानजुमा, पाको एल्कासेर, लो सेल्सो, फ्रान्सिस कोक्विलिन, इटिने कापोइ, ड्यानियल पारेजो, पाउ टोरेस, राहुल अल्वियोल, जुआन फोयथ र गोलरक्षक जेरोनिमो रुल्ली टोलीमा रहेका छन् ।

गतवर्ष युरोपा लिग च्याम्पियन बनेको भियारियाल युरोपियन ट्रफी जित्ने सबैभन्दा सानो सहरको टिम हो । एम्रीले सन् २०१६ मा सेभियाबाट युरोपा लिगको फाइनलमा क्लोपको लिभरपुललाई पराजित गर्दै उपाधि जितेका थिए ।

लिभरपुल र भिल्लारियल यसअघि दुईपटक भिडेका छन् । सन् २०१५-१६ मा युरोपा लिगको सेमिफाइनलको पहिलो लेगमा लिभरपुल ३–० ले विजयी हुँदा बन्दा दोस्रो खेलमा भिल्लारियल १–० ले विजयी भएको थियो ।

पछिल्लो पाँच खेलको तुलना गर्दै दुवै टोली अपराजित छ । दुवै टोलीले समान तीन जित र २ बराबरीको नतिजा निकालको छ । यसर्थ लिभरपुल र भिल्लारियलबीचको खेल रोमाञ्चक र प्रतिस्पर्धात्मक हुने अपेक्षा गरिएको छ ।