एजेन्सी – युरोपा लिगको सेमिफाइनलको पहिलो लेगमा जर्मन क्लब आरबी लाइप्जिग र आइनट्राख्ट फ्रान्कफुर्टले सफलता हात पारेका छन् ।

आरबी लाइप्जिगले घरेलु मैदानमा स्कटिस क्लब रेन्जर्समाथि १–० को जित निकालेको हो । घरेलु मैदानमा बिहीबार राति भएको खेलमा घरेलु टोलीको जितमा खेलको अन्त्यतिर एन्जेलिनोले गरेको गोल नै निर्णयक बन्यो ।

उनले ८५औं मिनेटमा गोल गर्न सफल भएका थिए । यो जितसँगै लाइप्जिगले फाइनल पुग्ने सम्भावना बलियो बनाएको छ । अर्काे साता हुने दोस्रो लेगमा यही नतिजा कायम राख्न सके लाइप्जिग फाइनलमा पुग्नेछ ।

रेन्जर्सको पनि फाइनल पुग्ने सम्भावना जीवितै रहँदा घरेलु मैदानमा हुने दोस्रो लेगमा कम्तीमा पनि २–० को जित निकाल्नुपर्ने हुन्छ । १–० को जितले पनि दुवै टोलीको फाइनल पुग्ने सम्भावना रहँदा अतिरिक्त समय वा टाइब्रेकरबाट निर्णय हुनेछ ।

यस्तै आइनट्राख्ट फ्रान्कफुर्टले इंग्लिस क्लब वेस्ट ह्याम युनाइटेडलाई उसकै मैदानम २–१ को जित निकालेको छ । आइनट्राख्ट फ्रान्कफुर्टको जितमा अन्सगर र दाइची कामदाले गोल गरे । घरेलु टोलीका मिचेल एन्टेनियोले एक गोल फर्काए ।

खेलको पहिलो मिनेटमा नै अन्सगरको गोलबाट फ्रान्कफुर्टले सुरुवाती अग्रता लिएको थियो । उनले राफयल सान्तोष बोरको पासमा गोल गर्न सफल भएका थिए । २१औं मिनेटमा मिचेल एन्टेनियोले गोल गर्दै खेललाई १–१ गोलको बराबरीमा ल्याए । ५४औं मिनेटमा दाइची कामदाले गोल गर्दै फ्रान्कफुर्टको जित पक्का गरे ।

यो जितसँगै आइनट्राख्ट फ्रान्कफुर्टले फाइनल पुग्ने सम्भावना बलियो बनाएको छ । अब अर्काे साता हुने दोस्रो लेगमा यही नतिजा कायम राख्न सके फ्रान्कफुर्ट फाइनलमा पुग्नेछ । वेस्टह्यामलाई फाइनल पुग्न कम्तीमा पनि २–० को जितको खाँचो छ ।