काठमाडौं (हाम्रो खेलकुद)– राष्ट्रिय फुटबल टोलीबाट निकालिएका १० खेलाडीले मुख्य प्रशिक्षक अब्दुल्लाह अलमुताइरीसँगको घटनाका बारेमा अखिल नेपाल फुटबल संघ (एन्फा) लाई लिखित जानकारी बुझाएका छन् । खेलाडीकोतर्फबाट रोहित चन्दले सोमबार एन्फाका महासचिव इन्द्रमान तुलाधर जानकारीको पत्र बुझाएका छन् ।

यसैबीच, एन्फा खेलाडी संघले खेलाडी र प्रशिक्षकबीचको विवादको छानविनका लागि माग गरेको छ । खेलाडी सघका अध्यक्ष विक्रम लामाले एन्फा महासचिव तुलाधरलाई छानबिनको मागसहित पत्र बुझाएका थिए । ‘हामी राष्ट्रिय फुटबल टोलीका १० खेलाडी एएफसी एसियन कपको तयारीमा रहेको राष्ट्रिय टोलीको प्रशिक्षणबाट भागेर बाहिरिएको भन्ने समाचार सार्वजनिक संचारमाध्ममा आएकोले हामी एकदम दुखित भएका छौं । राष्ट्रिय टोलीका लागि खेल्नु हाम्रो सानोदेखिको सपना हो । विभिन्न आरोह अवरोहका बाबजुद पनि हामी निरन्तर राष्ट्रिय टोलीको जिम्मेवारी निर्वाह गर्दै आएका छौं, १० खेलाडीको संयुक्त हस्ताक्षरित पत्रमा भनिएको छ ।

प्रशिक्षणका दौरान टोलीको कार्यवाहक नेतृत्व गरीरहेका रोहित चन्दले प्रशिक्षकको प्रश्न पश्चात जायज माग राख्दा उनीसँग प्रशिक्षक अब्दुल्लाह अलमुताइरीले गरेको व्यवहारप्रति हाम्रो असन्तुष्टि थियो । त्यसबारे नै कुरा गर्न जाँदा हामीलाई पटक पटक क्याम्प छोड्न भनेपछि हामी बाहिरिएका हौं , पत्रमा भनिएको छ,‘ हामीलाई क्याम्प छोड्ने भनेपछि स्वयं प्रशिक्षक अलमुताइरी, सहायक प्रशिक्षक किरण श्रेष्ठ, गोलरक्षक प्रशिक्षक विकास मल्ल र सहायक व्यवस्थापक कृष्णभक्त मानन्धरलाई जानकारी गराएका हौं । हामीले दैनिक जीवनयापनका लागि आवश्यक आधारभूत माग राख्दा उल्टो क्याम्प छोड्न निर्देशन दिनु र त्यसमाथि एन्फाका पदाधिकारीले सार्वजनिक रुपमा हामीविरुद्ध नै अनावश्यक प्रतिक्रिया दिनुले हामीलाई निकै दुखित तुल्याएको छ ।’

त्यस्तै खेलाडी संघले बुझाएको पत्र भनिएको छ, ‘ १० खेलाडीले एएफसी एसियन कपको तयारीमा रहेको अवस्थामा प्रशिक्षक अब्दुल्लाह अलमुताइरीबाट नै क्याम्प छोड्न निर्देशन दिएको जानकारी हामीले पाएका छौं । तर सार्वजनिक संचारमाध्ममा भने राष्ट्रिय टोलीका व्यवस्थापले खेलाडीको विषयमा गलत टिप्पणी दिएको र त्यसले खेलाडीमा परेको असरले हामी एकदम दुखित छौं ।’

बिहीबार १० खेलाडीले संयुक्त रुपमा पत्रकार सम्मेलन गर्दै घटना विवरण सार्वजनिक गरेका थिए । आइतबार अलमुताइरीले एन्फा महासचिव तुलाधरलाई पत्र लेख्दै ती खेलाडीलाई कारवाही नगर्न र आफूले उनीहरुलाई टोलीमा नफर्काउने समेत प्रष्ट पारेका थिए ।

खेलाडीले क्याम्प छोड्नुअघि स्वयं प्रशिक्षक अलमुताइरी, सहायक प्रशिक्षक किरण श्रेष्ठ, गोलरक्षक प्रशिक्षक विकास मल्ल र सहायक व्यवस्थापक कृष्णभक्त मानन्धरलाई जानकारी गराएको पनि अवगत गराएका छन्, खेलाडी संघको पत्रमा भनिएको छ,‘ खेलाडीले सधैँ राष्ट्रिय टोलीलाई प्रमुख प्राथमिकत्तामा राख्दै आएका छन् । राष्ट्रिय टोलीको अवस्थाबारे खेलाडीहरुले व्यवस्थापनसँग पटक पटक कुरा राख्दा समेत नेतृत्वबाट उचित सम्बोधन नभएको हामीले जानकारी पाएका छौं । यसरि खेलाडीहरुमाथि सार्वजनिक रुपमा झुटो आरोप लगाएर खेलाडीको मान मर्यादामा आंच पुग्ने अभिव्यक्ति दिने र कदम चाल्ने व्यक्तिहरु खेलाडी मात्र नभएर समग्र फुटबल विकासमा बाधक हुन् । एन्फाले यस विषयमा उचित छानविन गरेर दोषीलाई कारवाही गरोस भन्ने हामीले माग राखेका छौं ।’

संघले यो गम्भीर विषयलाई एन्फाले प्राथमिकतामा राखेर चाडो भन्दा चाडो उचित कदम अघि चाल्ने आशा राखेको छ । १० खेलाडीमा रोहित सहित सुजल श्रेष्ठ, विशाल श्रेष्ठ, विशाल राई, विमल घर्तीमगर, अन्जन विष्ट, तेज तामाङ, सुमन लामा, अनन्त तामाङ र दीनेश राजवंशी छन् । अलमुताइरीले बिहीबार नै १७ नयाँ खेलाडीलाई प्रशिक्षणमा सामेल गराएका थिए ।