एजेन्सी – एक गोलले पछि परेको स्थिति उल्ट्याएर पूनरागमन जित निकाल्दै एसी मिलान इटालियन सिरी ‘ए’ को शीर्षस्थानमा उक्लन सफल भएको छ ।

मिलानले घरेलु टोली हेलास भेरोनामाथि ३–१ को पूनरागमन जित निकालेपछि शहरी प्रतिद्धन्द्धी इन्टर मिलानलाई पछि पार्दै शीर्षस्थानमा उक्लन सफल भएको हो । मिलानको पूनरागमन जितमा सान्द्रो टोनालीले दुई तथा एलेसान्द्रो फ्लोरेन्जीले एक गोल थपे । घरेलु टोली हेलास भेरोनाका मार्काे डेभिड फाराओनीको गोल सान्त्वना बन्यो ।

भेरोनामा आइतबार राति भएको खेलको १५औं मिनेटमा सान्द्रो टोनालीले गोल गरेपनि भिएआरबाट मान्यता नपाउँदा मिलानले अग्रता लिन सकेन । त्यसपछि ३८औं मिनेटमा मार्काे डेभिड फाराओनीको गोल गरेपछि मिलान १–० ले पछि पर्यो । पहिलो हाफको इन्ज्युरी समयको थप गरिएको तेस्रो मिनेटमा सान्द्रो टोनालीले गोल गर्दै खेललाई १–१ गोलको बराबरीमा ल्याए । उनले राफायल लियोको पासमा गोल गर्न सफल भएका थिए ।

५०औं मिनेटमा राफायल लियोकै पासमा सान्द्रोले व्यक्तिगत र टोलीका लागि दोस्रो गोल गर्दै मिलानलाई खेलमा २–१ को अग्रता दिलाए । त्यसपछि पछि ८६औं मिनेटमा जुनियर मेसिएसको पासमा एलेसान्द्रो फ्लोरेन्जीले गोल गर्दै मिलानको सानदार पूनरागमन जित पक्का गरे ।

यो जितसँगै मिलानले शीर्षस्थानमा २ अंकको अग्रता लिदै उपाधि जित्ने सम्भावना बलियो बनाएको छ । मिलानको ३६ खेलबाट ८० अंक तथा समान खेलबाटै इन्टर मिलानको ७८ अंक छ । अब दुई चरणको खेल बाँकी रहँदा सिरी ‘ए’ कोे उपाधिको छिनोफानो अन्तिम खेलबाटै हुने सम्भावना छ । पराजित भेरोना ५२ अंक जोडेर नवौं स्थानमा रहेको छ ।