एजेन्सी – फरवार्ड ह्यारी केनको दुई तथा ह्युङ मिन सनको गोलमा टोटेनहम हटस्परले इंग्लिस प्रिमियर लिगमा जित निकालेको छ । टोटेनहमले घरेलु मैदानमा १० खेलाडीमा समेटिएको आर्सनललाई ३–० ले पराजित गरेको हो ।

टोटेनहम हटस्पर स्टेडियममा बिहीबार राति भएको खेलको २२औं मिनेटमा ह्यारी केनको पेनाल्टी गोलबाट टोटेनहमले सुरुवाती अग्रता लिन सफल भयो । डिजान कुलुसेभ्स्कीको क्रसलाई नियन्त्रणमा लिने क्रममा रहेका सनलाई सेड्रिक सोराएसले फउल गर्न पुगेपछि रेफ्रीले पेनाल्टी प्रदान गर्दा केन चुकेनन् ।

३३औं मिनेटमा पाहुना टोली आर्सनल १० खेलाडीमा समेटिन पुग्यो । रोव होल्डिङ दोहोरो पहेँलो कार्ड खाँदै मैदानबाट बाहिरिएपछि आर्सनल १० खेलाडीमा समेटिन पुग्यो । त्यसको फाइदा टोटेनहमले उठाउन सफल भयो ।

३७औं मिनेटमा ह्यारी केनले व्यक्तिगत र टोलीका लागि दोस्रो गोल गरेपछि टोटेनहमले पहिलो हाफमा २–० को अग्रता लिन सफल भयो । उनले रोड्रिगो बेन्टनकरको पासमा गोल गर्न सफल भएका थिए ।

दोस्रो हाफको शुरुमै ४७औं मिनेटमा ह्युङ मिन सनले गोल गर्दै टोटेनहमलाई ३–० ले अघि बढाए । त्यसपछि थप गोल निस्कन नसक्दा आर्सनल विजयी हुन सफल भयो ।

टोटेनहमको जितसँगै शीर्ष चारको दौड थप रोचक बनेको छ । पाँचौ स्थानमा रहेको टोटेनहमको ३६ खेलबाट ६५ अंक पुगेको छ । टोटेनहमसँग हार बेहोरेको आर्सनलको ६६ अंक छ ।