एजेन्सी – इटालियन क्लब पल पोग्बाले इंग्लिस क्लब म्यानचेस्टर युनाइटेडमा रहेका मिडफिल्डर पल पोग्बालाई पुन: टुरिन फर्काउने प्रयास गर्ने भएको छ । त्यस्तै फ्रान्सकै पिएसजीले पोग्बालाई स्वदेश फर्काउने लक्ष्य राखेको छ ।

सन् २०१६ मा युभेन्टस छोडेर म्यानचेस्टर युनाइटेड पुगेका पोग्बा यो सिजनको अन्त्यसँगै फ्रि एजेन्ट बन्दैछन् । यसअघि पनि फ्रि एजेन्टका रुपमा नै युनाइटेड छोडेर युभेन्टस पुगेका उनलाई म्यानचेस्टर क्लबले मोटो रकम खर्चेर पुन: अनुबन्धन गरेको थियो । तर युनाइटेडमा अपेक्षित प्रदर्शन गर्न नसकिरहेका पोग्बालाई युभेन्टसले फर्काउन चाहेको छ ।

इटालीको प्रतिष्ठित संचार माध्यम ला गजेटा देल्लो स्पोर्टका अनुसार युभेन्टस र पोग्बाका प्रतिनिधिले यसबारे प्रारम्भिक छलफल गरिसकेका छन् । पोग्बाका एजेन्ट मिनो रायोलाको निधनसँगै राफाएला पिमेन्टाले उनको प्रतिनिधित्व गर्दैछन् ।

त्यसो त सम्झौताबाट मुक्त हुन लागेका पोग्बासँग अन्य विकल्प पनि छ । फ्रान्सेली च्याम्पियन पेरिस सेन्ट जर्मेनले पनि उनलाई अनुबन्ध गर्ने संकेत देखाएको छ । युभेन्टसको तुलनामा पिएसजीले मोटो रकम प्रस्ताव गर्ने हुनाले पोग्बाको निर्णय नै अन्तिम हुनेछ । पिएसजी फ्रान्सेली खेलाडीलाई यस सिजन आफ्नो मुख्य ट्रान्सफरको रुपमा ल्याउन चाहन्छ ।

म्यानचेस्टर सिटीले पनि पोग्बा अनुबन्ध गर्नेबारे इंग्लिस मिडियामा चर्चा रहेको थियो । तर पोग्बाले प्रिमियर लिग बाहिर खेल्ने भनेपछि पिएसजी र युभेन्टस नै सम्भावित गन्तव्यका रुपमा अघि आएका छन् । गत सिजनसम्म रियल म्याड्रिडले पनि पोग्बालाई अनुबन्ध गर्ने सोचेको थियो । तर जिनेदिन जिदानको प्रस्थान र कामाभिंगाको आगमनसँगै त्यो चर्चा सेलाएको छ ।