एजेन्सी – उपाधि दौडमा रहेको म्यानचेस्टर सिटी बराबरीमा रोकिएको छ । दुई गोलले पछि परेको सिटीले पेनाल्टीमार्फत अग्रता लिने अवसर पाएपनि वेस्ट ह्याम युनाइटेडसँग २–२ गोलको बराबरी खेलेको हो ।

लन्डन स्टेडियममा आइतबार राति भएको खेलमा घरेलु टोली वेस्ट ह्यामका लागि दुवै गोल जारोड बोवेनले गर्दा सिटीका लागि ज्याक ग्रेलिसले एक गोल तथा एक गोल उपहार पाएको थियो ।

खेलको २४औं मिनेटमा पाब्लो फोर्नाल्सको पासमा बोवेनले गोल गर्दै वेस्ट ह्यामलाई सुरुवाती अग्रता दिलाए । ४५औं मिनेटमा बोवेनले मिचेन एन्टोनियोको पासमा व्यक्तिगत र टोलीका लागि गोल गर्दै वेस्ट ह्यामको अग्रता दोब्बर पारे ।

४९औं मिनेटमा ज्याक ग्रेलिसले गोल गर्दै सिटीलाई खेलमा फर्काउने संकेत दिए । उनले रोड्रीको पासमा गोल गर्न सफल भएका थिए । ६९औं मिनेटमा भ्लादिमिर कोउफलले आत्मघाती गोल गरेपछि सिटी हारबाट जोगियो ।

८६औं मिनेटमा सिटीले अग्रता लिने सुवर्ण मौका खेर फाल्दा सिटी जितबाट वञ्चित बन्यो । रियाद महारेजको पेनाल्टीलाई वेस्ट ह्यामका गोलरक्षक लुकास्ज फाविएन्स्कीले बचाउँदै वेस्ट ह्यामलाई हारबाट जोगाए ।

यो बराबरीसँगै शीर्षस्थानमा रहेको सिटीले अग्रता फराकिलो बनाउने अवसर गुमाउँदा दोस्रो स्थानको लिभरपुललाई फाइदा पुगेको छ ।

सिटीको ३७ खेलबाट ९० अंक तथा दोस्रो स्थानमा रहेको लिभरपुलको ८६ अंक छ । लिभरपुलले एक खेल कम खेलेको छ । वेस्ट ह्याम ५६ अंक जोडेर सातौ स्थानमा रहेको छ ।

त्यसअघि फरवार्ड ह्यारी केनको पेनाल्टी गोलमा टोटेनहम हटस्परले इंग्लिस प्रिमियर लिगमा महत्वपूर्ण जित निकालेको थियो । टोटेनहमले घरेलु मैदानमा बर्नलेलाई १–० ले पराजित गर्दै शीर्ष चारमा रहने सम्भावना जीवित राख्यो ।

टोटेनहम हटस्पर स्टेडियममा आइतबार साँझ भएको खेलमा घरेलु टोलीले ६९ प्रतिशत बल पोसेसन राख्दै लगातार दवाव बढाएपनि गोलको लागि पेनाल्टीकै सहारा लिनुपरेको थियो ।

पहिलो हाफको इन्ज्युरी समयको थप गरिएको आठौं मिनेटमा केनले पेनाल्टीमा गोल गर्दै घरेलु टोलीलाई अग्रता दिलाए । एस्ले बार्नेसले पेनाल्टी बक्समा ह्यान्ड गर्न पुगेपछि रेफ्रीले भिएआरको सहायता लिदै टोटेनहमलाई पेनाल्टी प्रदान गर्दा केन चुकेनन् ।

त्यसपछि दोस्रो हाफमा पनि टोटेनहमले लगातार दवा सिर्जना गरेपनि थप गोल निस्कन नसक्दा पहिलो हाफमा केनले गरेको पेनाल्टी गोल नै टोटेनहमको जितमा निर्णायक बन्यो ।

यो महत्वपूर्ण जितसँगै टोटेनहमको ३७ खेलबाट ६८ अंक जोडेर चौथो स्थानमा रहेको छ । एक खेल कम खेलेको आर्सनलको ६६ अंक छ । पराजित बर्नले ३४ अंक जोडेर १७औं स्थानमा रहेको छ ।