एजेन्सी – इंग्लिस प्रिमियर लिग अन्तर्गत यो सिजन घटुवा हुने दुई टोलीको टुंगो लागिसकेको छ । नर्विच र वाटफर्ड पुछारमा रहेर रेलिगेसनमा पर्दा तेस्रो टोलीको निर्णय भने अन्तिम दिनको खेलबाट हुने पक्का भएको छ ।

रेलिगेसन हुने तेस्रो टोलीमा तीन टोलीको सम्भावना रहेको छ । हाल एभर्टन ३६ अंकसहित १६ औं, लिड्स ३५ अंकसहित १७ औं तथा बर्नली ३४ अंकसहित १८ औं स्थानमा छ । अन्तिम खेलपछि १८ औं स्थानमा रहने टोली वाटफर्ड र नर्विचसँगै दोस्रो श्रेणीमा झर्नेछन् । तर बर्नली र एभर्टनले अन्तिम दिनको खेलअघि १-१ खेल खेल्न बाँकी रहेको छ ।

विहीबार हुने खेलमा एभर्टनले क्रिस्टल प्यालेसको अतिथ्यता गर्नेछ । उक्त खेलमा जित हासिल गरे एभर्टनले प्रिमियर लिगको यात्रालाई निरन्तरता दिनेछ । हुन त फ्रान्क लाम्पार्ड प्रशिक्षक रहेको एभर्टनले आइतबार भएको खेलमा ब्रेन्टफर्डलाई हराएको भएपनि सुरक्षित हुने थियो । तर दुई पटक अग्रता लिएपनि टोलीले ३-२ को हार बेहोर्न पुग्यो ।

बर्नलीले पनि विहीबार हुने खेलमा एस्टन भिल्लाको सामना गर्दैछ । आइतबार टोटेनहम हट्सपरविरुद्ध १-० को हार बेहोरेको टोली यस खेलमा पराजित भए अन्तिम खेलमा अन्य टोलीको नतिजा कुर्नुपर्ने हुन्छ । लिड्सले आइतबार अन्तिम मिनेटमा बराबरी गरेपछि बर्नलीलाई उछिनेको थियो ।

प्रिमियर लिगको अन्तिम खेलमा एभर्टनले आर्सनलसँग खेल्नेछ । त्यस्तै लिड्सले ब्रेन्टफर्ड र बर्नलीले न्युकासल युनाइटेडको सामना गर्नेछ ।