एजेन्सी – इंग्लिस प्रिमियर लिगमा लेस्टर सिटीले रेलिगेसनमा परिसकेको वाट्फोर्डमाथि सानदार पूनरागमन जित निकालेको छ ।

लेस्टरले एक गोलले पछि परेको स्थिति उल्ट्याएर वाट्फोर्डलाई उसकै मैदानमा ५–१ को फराकिलो हार चखाएको हो । लेस्टरको जितमा जेमी भार्डी र हार्भे बार्नेसले समान दुई तथा जेम्स म्याडिसनले एक गोल गरे । वाट्फोर्डका जोओ पेड्रोको गोल सान्त्वना बन्यो ।

भिकारेज रोड वाट्फोर्डमा आइतबार राति भएको खेलको छैटौं मिनेटमा जोओ पेड्रोको गोलबाट घरेलु टोलीले सुरुवाती अग्रता लिन सफल भएको थियो । तर, त्यो अग्रतालाई घरेलु टोलीले जोगाउन सकेन । १८औं मिनेटमा जेम्स म्याडिसनले युरी टिलेमान्सको पासमा गोल गर्दै खेललाई १–१ गोलको बराबरीमा ल्याए ।

२२औं मिनेटमा जेमी भार्डीले जेम्स म्याडिसनको पासमा गोल गर्दै लेस्टरलाई २–१ को अग्रता दिलाए । ४६औं मिनेटमा हार्भे बार्नेसले मार्क अल्ब्राइटनको पासमा गोल गरेपछि लेस्टर खेलमा ३–१ ले अघि बढ्यो ।

७०औं मिनेटमा जेमी भार्डीले हार्भे बार्नेसको पासमा व्यक्तिगत दोस्रो तथा टोलीका लागि चौथो गोल गरेपछि लेस्टर फराकिलो जिततर्फ अग्रसर बन्यो । ८६औं मिनेटमा हार्भे बार्नेसले जेम्स म्याडिसनको पासमा व्यक्तिगत दोस्रो तथा टोलीका लागि पाँचौ गोल गर्दे लेस्टरलाई सानदार पूनरागमन जित दिलाए ।

यो जितसँगै लेस्टर ३६ खेलबाट ४८ अंक जोडेर नवौं स्थानमा रहेको छ । पराजित वाट्फोर्ड २३ अंक जोडेर १९औं स्थानमा रहेको छ ।