एजेन्सी – दुई शहरी प्रतिद्धन्द्धी एसी मिलान र इन्टर मिलानले सफलता हात पारेपछि इटालियन सिरी ‘ए’ को उपाधि होड रोमाञ्चक बन्दा अब उपाधिको छिनोफानो अन्तिम खेलबाटै हुने भएको छ ।

आइतबार राति शीर्ष दुईमा रहेर उपाधि होडमा रहेको एसी मिलानले एटलान्टालाई तथा इन्टर मिलानले क्याग्लिएरीलाई पराजित गरेपछि उपाधिको छिनोफानो अन्तिम खेलबाटै लाग्ने भएको हो ।

अब अन्तिम खेलमा मिलानले सस्सुलोसँग तथा इन्टरले साम्पडोरियासँग खेल्दैछ । दुवै टोलीलाई च्याम्पियन बन्न जितको खाँचो छ । दुवै टोलीले बराबरी खेलेको अवस्थामा मिलान च्याम्पियन बन्नेछ । मिलान बराबरीमा रोकिदा इन्टरले सफलता हात पारे गोलअन्तर र हेड टु हेडमा छिनोफानो हुनेछ ।

घरेलु मैदानमा एसी मिलानले एटलान्टालाई २–० ले पराजित गर्दा राफय लियो र थियो हर्नान्डेजले गोल गरे । मिलानोमा भएको खेलको ५६औं मिनेटमा राफायल लियोको गोलबाट मिलानले अग्रता लिदा ७५औं मिनेटमा थियो हर्नान्डेजले गोल गर्दै टोलीलाई महत्वपूर्ण ३ अंक दिलाउँदै उपाधि यात्रा जीवितै राखे ।

जितसँगै शीर्षस्थानमा रहेको मिलानको ३७ खेलबाट ८३ अंक पुगेको छ । मिलानले दोस्रो स्थानको इन्टरलाई २ अंकले पछि पारेको छ । पराजित एटलान्टा ५९ अंक जोडेर आठौं स्थानमा रहेको छ ।

अर्काे खेलमा इन्टर मिलानले घरेलु टोली क्याग्लिएरीमाथि ३–१ को जित निकाल्दै उपाधि जित्ने सम्भावना जीवितै राखेको छ ।इन्टरको जितमा लोउटारो मार्टिनेजले दुई तथा माटियो डारमिएनले एक गोल गरे । क्याग्लिएरीका चारालाम्वसले एक गोल फर्काए ।

यो जितसँगै दोस्रो स्थानमा रहेको इन्टरको ८३ अंक पुगेको छ । क्याग्लिएरी २९ अंक जोडेर १८औं स्थानमा रहेको छ ।