हेटौंडा (हाम्रो खेलकुद) – विभागीय भिडन्तमा नेपाल एपिएफ क्लबलाई टाइब्रेकरमा पराजित गर्दै त्रिभुवन आर्मी फुटबल क्लब मकवानपुरमा जारी स्थानीय तह शहिद स्मृति चौथो मकवानपुर गोल्डकप अन्तर्राष्ट्रिय आमन्त्रण फुटबल प्रतियोगिताको सेमिफाइनलमा प्रवेश गरेको छ ।

आर्मीले अर्को विभागीय टोली एपिएफ फुटबल क्लबलाई टाइब्रेकरमा ५–४ ले पराजित गर्दै आर्मीले अन्तिम चारमा स्थान पक्का गरेको हो । निर्धारित समयको खेल १–१ गोलको बराबरीमा सकिएपछि खेल टाइब्रेकरमा पुग्दा आर्मीले सफलता हात पारेको हो ।

टाइब्रेकरमा आर्मीका दीपक गुरुङ, सिमन्त थापा मगर, सन्तोष केसी, कमल बहादुर थापा र दिनेश हेन्जनले गोल गरे । एपिएफका नविन लामा, सुदिप शिख्राकार, सनिश श्रेष्ठ, रवि थिङले गोल गर्दा मणि कुमार लामाले गोल गर्न सकेनन् ।

त्यसअघि मकवानपुरस्थित पिप्ले क्याम्पा रंगशालामा प्रतिस्पर्धात्मक बनेको खेलको दोस्रो हाफमा दिनेश हेन्जनको पेनाल्टी गोलबाट आर्मीले अग्रता लिन सफल भएको थियो । इन्ज्युरी समयको थप गरिएको अन्तिम समयमा सुदिप सिख्राकारले एपिएफका लागि गोल गर्दै खेललाई रोमाञ्चक मोडमा ल्याए ।

त्यसअघि पहिलो हाफमै आर्मीले पेनाल्टीमार्फत अग्रता लिने अवसर खेर फालेको थियो । विवेक बस्नेतको पेनाल्टी प्रहारलाई गोलरक्षक राजु नगरकोटीले बचाएका थिए । टाइब्रेकरमा एक पेनाल्टी बचाएका आर्मीका गोलरक्षक बिकेश कुथु म्यान अफ द म्याच घोषित भए । उनले १० हजार रुपैया र ट्रफी हात पारे ।

प्रतियोगितामा मंगलबार दोस्रो क्वाटरफाइनल खेलमा मनाङ मर्स्याङ्दी क्लब र नेपाल पुलिस क्लबबीच प्रतिस्पर्धा हुनेछ ।
मकवानपुर जिल्ला फुटबल संघको आयोजनामा जारी प्रतियोगिताको विजेताले उपाधिसहित नगद १५ लाख हात पार्नेछ । उपविजेताले १० लाख प्राप्त गर्नेछ । कुल १२ टोलीहरुको सहभागिता रहेको प्रतियोगिताको फाइनल जेठ ३० मा हुनेछ ।