काठमाडौ (हाम्रो खेलकुद) – राष्ट्रिय खेलकुद परिषद (राखेप) का सदस्य सचिव टंकलाल घिसिङले अखिल नेपाल फुटबल संघ (एन्फा) का अन्तर्राष्ट्रिय सम्बन्ध प्रमुख नवीन पाँडेलाई शनिबार स्वागत गर्दै सफल कार्यकालको लागि शुभकामना दिएका छन् ।

सदस्यसचिव घिसिङले पाँडेलाई खादा लगाउँदै त्रिपुरेश्वरस्थत सदस्य सचिवको कार्यलयमा स्वागत गरेका हुन् । त्यसक्रममा घिसिङले देशकै सबभन्दा लोकप्रिय खेलको संस्था एन्फाको एउटा महत्वपूर्ण अन्तर्राष्ट्रिय सम्बन्ध प्रमुखमा नियुक्त हुनुभएकोमा तपाईं (नवीन पाँडे) लाई हार्दिक बधाई एवम् शुभकामना व्यक्त गरे ।

उनले स्वयम्सेवकको भूमिकामा एन्फाले अन्तर्राष्ट्रिय फुटबलमा नेपालको नाम फैलाउन सकोस्, अरु देश र व्यवसायिक क्लबहरुसँगको सम्बन्ध राम्रो गर्न सुझाव दिए ।

पाँडे जर्मन एनअआरएन हुन् । सदस्यसचिव घिसिङले नेपाल र जर्मनीवीच संस्था र सरकारको तहमा खेलकुद विकासको लागि सम्बन्ध विस्तार गर्नको लागि पहल गर्न पनि आग्रह गरे ।

अर्बपति अमेरिकी वारेन वफेटको कम्पनी टीटीआई युरोपमा निर्देशकसमेत रहेका पाँडेले नेपाली फुटबल र खेलकुदको विकासको लागि सदैव पहल र सहयोग गर्न तयार रहेको तथा गरिरहेको बताए । उनले ४ वर्षअघि पनि छोटो समय एन्फामा अन्तर्राष्ट्रिय सम्बन्ध प्रमुखको रुपमा काम गरेपछि राजिनामा दिएका थिए ।

ए डिभजन क्लब हिमालयन शेर्पामार्फत नेपाली फुटबलमा फर्किएका उनी कपनमा सञ्चालित काठमाडौं किकर्सका अध्यक्ष पनि हुन् । किकर्सले स्कटिस कोच ली मेन्सन (युईएफए बी लाइसेन्स) ल्याएर कपअन स्पोर्टस सेन्टर, कपनमा फुटबल एकेमेमी सञ्चालन गरिरहेको छ, जहाँ यू–१२, यू–१४ र यू–१६ का करिव १ सय खेलाडीले नियमित अभ्यास गरिरहेका छन् ।