काठमाडौं (हाम्रो खेलकुद)– नेपाल पुलिस क्लबकी मिडफिल्डर दीपा न्यौपोन सम्मिलित डन बस्को फुटबल एकेडेमीले शनिबार भारतको केरेला महिला लिगमा जित हासिल गरेको छ ।

दीपाले २ गोल गरेको खेलमा डन बस्कोले इमिरेट्स सकर क्लबलाई ५–२ ले हराएको थियो । यसै साता भारत गएकी दीपाले पहिलो खेलमा भने मौका पाएकी थिइनन् । पहिलो खेलमै उनी प्लेयर अफ दी म्याच घोषित भएकी थिइन् ।

इमिरेट्सले खेलमा लिएको अग्रता जोगाउन सकेन । अनिथाको गोलबाट १४ औं मिनेटमा इमिरेट्सले अग्रता लिएको थियो । डन बस्कोकी प्रेश्माले २८ औं मिनेटमा बराबरी गोल गरिन् । ३६ औं मिनेटमा दीपाका गोलबाट डन बस्कोले अग्रता लिएको थियो ।

प्रेश्माले ५५ औं मिनेटमा र पुष्पाले ७९ औं मिनेटमा गोल गर्दा डन बस्को ४–१ ले अघि लागेको थियो । इमिरेट्सकी अल्फोन्सियाले गोल गर्दै अन्तर घटाएकी थिइन् । दीपाले इन्जुरी समयको पहिलो मिनेटमा गोल गर्दै टोलीको जित अन्तरलाई फराकिलो पारिन् ।

६ वर्षयता पुलिसकी खेलाडी दीपा अर्को महिना स्वदेशमा हुने महिला साफ च्याम्पियनसिपको प्रारम्भिक छनोटमा परेकी थिइन् । केरेला लिगमा राष्ट्रिय टोलीकी सावित्रा भण्डारी सम्मालको गोकुलम केरेला एफसीले विजयी सुरुवात गरेको थियो । ११–० को जितमा सावित्राले ५ गोल गरेकी थिइन् ।