दिपक बोहोरा ,पाँचथर

पाँचथरमा हुने पूर्वको प्रतिष्ठित फाल्गुनन्द गोल्ड कप र पाँचथर गोल्ड कप आयोजना हुन नसकेको ३ वर्ष भइसकेको छ । त्यसको कारण हो, खेलमैदानको अभाव । गोल्डकप आयोजना हुँदै आएको फिदिम माविको खेलमैदान भत्किएपछि पुःन निर्माणमा सुरु भएको थियो । तर, पूर्न निर्णाणले ढिलाइ हुँदा गोल्ड कप मात्र होइन पाँचथरमा हुने अधिकांश खेलकुद गतिविधि ठप्प भएका छन् ।

स्थानिय खेलाडीहरुले अभ्यास गर्न पाएका छैनन् । नवौं राष्ट्रिय खेलकुदको तयारीका लागि अभ्यास गर्ने खेल मैदान समेत सरदमुकाम फिदिममा छैन । फिदिममा खेल मैदानको अभावले नवौं राष्ट्रिय खेलकुदको छनोट आयोजना र प्रशिक्षण सदरमुकाम बाहिर गर्नु पर्ने अवस्था आएको छ ।

रंगशाला बनाउने भनेर २ वर्ष अगाडि तामझामका साथ सिल्यान्यास गरेको खेल मैदानको अवस्था अहिले पनि फेरि एको छैन । करिब २ वर्ष पछि पनि अवस्था बेहाल छ । १० करोड ६३ लाख ५७ हजारमा ठेक्का लागेको खेल मैदानको काम गएको असार मसन्तमा सक्ने सम्झौता थियो । १७ महिनाको सम्झौता यही असारमा सकिए पनि खेलमैदान निर्माणको कामको प्रगति न्यून जस्तै छ । अहिलेसम्म २५ प्रतिशत मात्र काम सम्पन्न भएको बताइएको छ ।

काम हुँदाहुँदै बीचैमा छोडिएको छ । खेलमैदानमा माटो थुप्रिएको छ, झार उम्रिएको छ । पाँचथर सदरमुकाम फिदिममा फुटबल प्रतियोगितालगायतका अन्य खेलकुद गतिविधि हुने फिदिम खेलमैदानलाई व्यवस्थित रंगशाला बनाउने कामले गति नपाउँदा स्थानीय चिन्तित छन् ।

ताप्लेजुङमा खेल मैदानको अभावको कारण सधै हुँदै आएको लाखेजात्राको अवसरमा सञ्चालन गरिने पाथिभरा गोल्ड कप फुटवल प्रतियोगिता यो वर्ष भएन । वि.स २०२९ सालदेखि विभिन्न नाममा निरन्तर रुपमा फुटबल प्रतियोगिता हुँदै आएको थियो । पछिल्लो दुई संस्करण भने कोरोना महामारीका कारण गर्न नसकेको आयोजकले बताएका छन् ।

विगतका वर्षमा खेल सञ्चालन गरिने भानुजन माविको खेलमैदान अहिले लथालिङ्ग छ । विद्यालयले कम्पाउण्ड लगाउने लगायतका काम गरिरहेकाले खेलमैदान प्रयोग गर्न सकिने अवस्थामा छैन । जसका कारण यसपटक फुटबल प्रतियोगिता आयोजना हुन सकेन ।

जिल्ला खेलकुद विकास समिति ताप्लेजुङका अध्यक्ष नरेन्द्रकुमार माबोका अनुसार जिल्लामा हुने खेलकुद प्रतियोगिताहरु र अभ्यासका लागि खेलमैदानको अभाव छ। नवौं राष्ट्रिय खेलकुदको लागि छनोट खेल आयोजना गर्न र खेलाडी प्रशिक्षण गराउन नै समस्या भइरहेको उनले बताए ।

मेची पहाडकै शानको रुपमा रहेको इलामको माइभ्याली गोल्ड कप हुने इलामको ठूलो टुडिखेलको अवस्था पनि नाजुक रहेको इलामका खेलकर्मीहरु बताउँछन् । नेपाली सेनाको स्वमित्वमा रहेको खेल मैदानको तल्लो भागमा पहिरो गए पछि इलामका अधिकांश खेलकुद गतिविधि ठप्प रहेको अखिल नेपाल फुटबल संघ (एन्फा) का निर्वतमान केन्द्रिय सदस्य निरोज खड्की बताउँछन् । खेल मैदानको अभावमा सामान्य अभ्यास बाहेक खेल गतिविधि हुने अवस्था नरहेको उनले सुनाए ।

खेल मैदान व्यवस्थित गर्न नसक्दा पहाडी जिल्लाका प्रतिभाशाशी खेलाडीहरुले अवसर गुमाउँदै आएको फुटबल प्रशिक्षक पासाङ तामाङले बताए । केहि महिना अगाडि भएको प्रदेश स्तरीय फुटबल प्रतियोगितामा समेत मेची पहाडी जिल्लाहरुको प्रर्दशन फितलो हुन्नुको मुख्य कारणनै खेलमैदान अभाव रहेको उनले बताए । उनले प्रश्न गरे ‘पहाडी जिल्लामा अभ्यास गर्न मैदान नै छैन । अनि कसरी नतिजा ल्याउने ?’