एजेन्सी – क्याटलान क्लब बार्सिलोना र इंग्लिस क्लब म्यानचेस्टर सिटीले मैत्रीपूर्ण खेलमा रोमाञ्चक बराबरी खेलेका छन् । क्याम्प नोउमा बुधबार राति भएको खेलमा बार्सिलोना र सिटीले ३–३ गोलको बराबरी खेलेका हुन् ।

सुरुवातमै पछि पर्नुका बावजुत बार्सिलोनाले खेलमा दुईपटक अग्रता लिएर पनि त्यसलाई जोगाउन नसक्दा बराबरीमा रोकिन बाध्य बन्यो । घरेलु टोली बार्सिलोनाका लागि पिएरे एमेरिक औवामियाङ, फ्रान्की डि जोङ र मेम्फिस डिपाएले गोल गर्दा सिटीका जुलयिन अल्भारेज, कोल पाल्मेर र रियाद महारेजले गोल गरे ।

प्रतिस्पर्धात्मक खेलको २१औं मिनेटमा जुलियन अल्भारेजको गोलबाट सिटीले खेलमा सुरुवाती अग्रता लिएको थियो । तर, त्यो अग्रता लामो समय टिकेन । २९औं मिनेटमा औवामियाङले गोल गर्दै खेललाई १–१ गोलको बराबरीमा ल्याए ।

६६औं मिनेटमा फ्रान्की डि जोङले गोल गर्दै बार्सिलोनालाई खेलमा २–१ को अग्रता दिलाए । बार्सिलोनाको त्यो अग्रता पनि लामो समय टिकेन । ७०औं मिनेटमा कोल पाल्मेरले गोल गर्दै खेललाई २–२ गोलको बराबरीमा ल्याए ।

७८औं मिनेटमा परिवर्तित खेलाडी डिपाएले गोल गर्दै बार्सिलोनालाई पुनः ३–२ को अग्रता दिलाए । त्यसपछि इन्ज्युरी समयको थप गरिएको नवौं मिनेटमा रियाद महारेजले पेनाल्टीमा गोल गर्दै सिटीलाई हारबाट जोगाए ।

सिजनको बिचमा मैत्रीपूर्ण खेल आयोजना गर्नुको कारण भने फरक रहेको छ । नशासम्बन्धि घातक रोग एम्योट्रोफिक ल्याटरल स्क्लेरोसिस (एएलएस) बारे सचेतना जगाउन खेल आयोजना गरिएको हो । यस खेलबाट संकलित रकम लुजोन फाउन्डेसनमा पनि दिइनेछ ।

यसबाहेक खेलमा पूर्व स्पेनिस तथा बार्सिलोना गोलरक्षक जोआन कार्लोस उन्जुएका लागि सहयोग रकम संकलन गरिनेछ । उनलाई सन् २०२० मा एएलएस देखिएको थियो । उनी पेप बार्सिलोना प्रशिक्षक रहँदा गोलरक्षक प्रशिक्षक पनि रहेका थिए ।