काठमाडौं (हाम्रो खेलकुद)– दशरथ रंगशालामा ११ दिनपछि सुरु हुने महिला साफ च्याम्पियनसिपमा भाग लिनका लागि भुटानी राष्ट्रिय फुटबल टोली बिहीबार काठमाडौं आइपुगेको छ ।

भुटान टोलीलाई अखिल नेपाल फुटबल संघ (एन्फा) का पदाधिकारी तथा पूर्व खेलाडीहरुले त्रिभुवन अन्तर्राष्ट्रिय विमानस्थलमा स्वागत गरेका थिए । भारतले महिला साफ च्याम्पियनसिप खेल्न पाउने नपाउने निश्चित भइनसकेको अवस्थामा पनि नेपालले च्याम्पिनसिपको तयारी जारी राखेको छ । फिफाले अखिल भारत फुटबल महासंघ (आइएफएफए) लाई निलम्बन गरेपछि भारतको सहभागिता अनिश्चित बनेको हो ।

दक्षिण एसियाका सातै राष्ट्रको सहभागिता रहने भनिएको च्याम्पियनसिपमा अब ६ टोलीको मात्र प्रतिस्पर्धा हुने सम्भावना छ । समूह बीमा नेपालसहित भुटान र श्रीलंका छन् । अर्को समूहमा बंगलादेश, पाकिस्तान र माल्दिभ्स छन् । साफ च्याम्पियनसिपको सार्वाधिक सफल टोली भारत पनि समूह ए मै रहेको थियो ।

साफ च्याम्पियनसिप भदौ २१ गते देखि असोज ३ गते सम्म सञ्चालन हुने तय छ । पछिल्लो पटक विराटनगरमा साफ च्याम्पिनसिप आयोजना भएको थियो । त्यसमा नेपाललाई हराउँदै भारत च्याम्पियन बनेको थियो । साफ च्याम्पियनसिपका लागि नेपाली टोली अन्तिम तयारीमा जुटेको छ । टोलीमा अहिले ३५ खेलाडीले प्रशिक्षण गरिरहेका छन् ।