एजेन्सी – इंग्लिस क्लब न्यूक्यासल युनाइटेडले स्पेनिस क्लब रियल सोसिडाडका फरवार्ड एलेक्साण्डर इसाकलाई क्लबको कीर्तिमानी मुल्यमा अनुबन्ध गर्ने तयारी गरेको छ ।

स्वीडेनका २२ वर्षीय इसाकका लागि न्यूक्यासलले ६० मिलियन पाउन्ड खर्चने तयारी गरेको हो । न्यूक्यासलमा आबद्ध भए उनी क्लबको सबैभन्दा महँगा खेलाडी बन्नेछन् ।

न्युक्यासलको सन् २०१९ मा जर्मन क्लब होफेनहाइनबाट ब्राजिली फरवार्ड–मिडफिल्डर जोलिन्टनका लागि ४० मिलियन पाउण्ड खर्चिएको थियो । जुन क्लबले खर्चिएको कीर्तिमानी रकम हो ।

क्लबले गत जनवरीमा ब्राजिलियन मिडफिल्डर ब्रुनो गुइमारेसका लागि ३५ मिलियन र प्लस एड–अनहरू पनि भुक्तान गरेपनि न्यूक्यासलका लागि इसाकको हस्ताक्षर महत्वपूर्ण हुनेछ ।

न्यूक्यासलका मालिकले गत अक्टोबरमा क्लबको जिम्मा लिएपछि क्लब ट्रान्सफर बजारमा निकै सक्रिय बनेको छ । इसाकको हस्ताक्षरले यस समरमा म्याट टारगेट, स्वेन बोटम्यान र निक पोपलाई साइन गरिसकेपछि न्यूक्यासलको खर्च दोब्बर हुनेछ ।

अक्टोबर २०२१ मा नयाँ मालिकहरूले क्लबको जिम्मा लिएपछि क्लबले खेलाडी अनुबन्धमा २ सय मिलियन पाउन्ड खर्च गरिसकेको छ ।

जर्मन क्लब बोरुसिया डर्टमुन्डका पूर्व खेलाडी इसाकले सोसिडाडका लागि १३२ खेलमा ४४ र आफ्नो देशका लागि ३७ खेलमा ९ अन्तर्राष्ट्रिय गोल गरेका छन् ।