एजेन्सी – युरोपेली फुटबल अन्तर्गत समर ट्रान्सफर आज बन्द हुँदैछ । शीर्ष लिगका अधिकांश ठूला क्लबले ट्रान्सफर बजारमा आफ्नो खरिद-विक्री पूरा गरेपनि केहि क्लब अझै खेलाडी भित्र्याउने र पठाउने प्रक्रियामा छन् ।

विश्व फुटबलकै शीर्ष लिग मानिने प्रिमियर लिगमा यसपटक ऐतिहासिक कारोबार भएको छ । प्रिमियर लिगका २० क्लबले यसपटक १.७ बिलियन पाउण्ड खर्च गरिसकेका छन् । आज ट्रान्सफर विन्डो बन्द हुँदासम्म यो रकम पढ्ने पक्का छ । यसअघि सन् २०१७ मा प्रिमियर लिगका क्लबले १.४३ बिलियन खर्चेको सर्वाधिक थियो ।

पछिल्ला दुई सिजन कोरोना संक्रमणका कारण क्लबहरु खुलेर खर्चन डराइरहेका थिए । त्यसैले पनि गत सिजन लिगको खर्च १.१ बिलियन पाउण्ड रहेको थियो । कोरोनापछि क्लबहरुको आयस्रोत बिस्तारै लयमा फर्केसँगै ट्रान्सफर बजारमा खर्च पनि बढेको छ । गत सिजन दुवै ट्रान्सफर विन्डोमा भएको खर्च (१.४४ बिलियन) भन्दा यसपटक समर विन्डोमा बढी खर्च भएको छ ।

यसपटक प्रिमियर लिगमा १७ खेलाडी ३० मिलियन भन्दा बढी मूल्यमा विक्री भएका छन् । सन् २०२१ को विन्डोमा यो संख्या ८ खेलाडी थियो । अन्तिम दिन पनि यो संख्या बढ्ने सम्भावना छ ।

यसपटक लिगमा १ सय ४३ खेलाडी भित्रिएका छन् । गत सिजन १ सय ४८ खेलाडी दर्ता हुँदै बनेको कीर्तिमान यसपटक तोडिने पक्का जस्तै छ । गत सिजन अन्तिम दिन १४ खेलाडी भित्रिएका थिए ।

यसपटक म्यानचेस्टर युनाइटेडले ब्राजिलियन विंगर एन्टोनीसँगै ५ खेलाडी अनुबन्ध गर्न झन्डै २ सय मिलियन पाउण्ड खर्चियो । रियल म्याड्रिडका कासेमिरो, आयाक्सका लिसान्द्रो मार्टिनेज, फेयनुर्डका टिरेल मालासिया र ब्रेन्टफर्डबाट क्रिस्टियन एरिक्सन पनि युनाइटेड आएका छन् । क्रिस्टियानो रोनाल्डोले क्लब छाड्ने हल्ला चलेपनि प्रशिक्षक एरिक टेन हाग पोर्चुगिज फरवार्ड आफ्नो योजनामा रहेको बताउँदै आएका छन् ।

चेल्सीले ट्रान्सफर विन्डोमा इतिहासकै सर्वाधिक रकम खर्च गर्ने क्रममा २ सय ४८ मिलियन पाउण्ड खर्च गरेको छ । लेस्टरका डिफेन्डर वेस्ली फोफानासँगै ब्राइटनका मार्क कुकुरेला, नापोलीका कालिडु कौलिबली र म्यानचेस्टर सिटीका रहिम स्टर्लिङ भित्र्याएको चेल्सीले एभर्टनका एन्थोनी गोर्डनमा पनि नजर राखेको छ । त्यस्तै बार्सिलोनाका पिएर एमेरिक औबामेयाङ पनि चेल्सी आउने चर्चा छ ।

म्यानचेस्टर सिटी, टोटेनहम हट्सपर, लिभरपुल र आर्सनलले पनि यस सिजन खुलेर खर्च गरेका छन् । लेस्टर सिटीले भने हालसम्म सिनियर टोलीमा कुनै खेलाडी अनुबन्ध गरेको छैन । अन्तिम दिनमा लेस्टरले केही अनुबन्धन गर्ने अपेक्षा रहेको छ ।

इंग्ल्यान्डसँगै स्पेन, इटाली, जर्मनी र फ्रान्समा पनि आज ट्रान्सफर विन्डो बन्द हुनेछ । त्यसैले सबै क्लबहरु समयमा नै आफूले चाहेको खेलाडी अनुबन्ध गरेर सिजनमा ध्यान दिन तल्लिन हुनेछन् ।