एजेन्सी – ब्राजिल फुटबल कन्फेडेरेसन (सिविएफ) ले दुई मैत्रीपूर्ण खेलको लागि टोली घोषणा गर्दा यो सिजन इंग्लिस प्रिमियर लिगमा उच्च प्रदर्शन गरिरहेका आर्सनलका फरवार्ड गाब्रियल जेसससँगै गेब्रिएल मार्टिनेली र गेब्रिएल मागाल्हेस ब्राजिलको राष्ट्रिय टोलीबाट बाहिरिएका छन् ।

ब्राजिली प्रशिक्षक टिटेले कतार विश्वकप २०२२ अघिको दुई मैत्रीपूर्ण खेलका लागि २६ सदस्यीय टोली घोषणा गर्दा आर्सनलका यि तीन खेलाडीसँगै फिलिपे कौटिन्हो पनि टोलीबाट बाहिरिएका हुन् । ब्राजिलले यसै महिना फ्रान्समा घाना र ट्युनिसियासँग अन्तर्राष्ट्रिय मैत्रीपूर्ण खेल खेल्दैछ ।

यसै समरमा म्यानचेस्टर सिटीबाट आर्सनल आएका जेसस उच्च लयमा रहेका छन् । उच्च लयमा रहेका यि तीनै खेलाडी टिटेको विश्वकप टोलीमा समावेश हुने अपेक्षा गरिएको छ । प्रशिक्षक टिटेले प्रिमियर लिग क्लबबाट ११ खेलाडीहरुलाई टोलीमा समावेश गर्दा आर्सनलका तीन खेलाडी अटाएका छैनन् ।

ब्राजिली प्रशिक्षक टेटेले नयाँ खेलाडीलाई अवसर दिन केही खेलाडीलाई विश्राम दिएको बताएका छन् । प्रशिक्षक टिटेले एस्टन भिल्लाका मिडफिल्डर फिलिपे कौटिन्होलाई पनि टोलीमा समेटेका छैनन् । ‘कौटिन्हो असाधारण खेलाडी हुन् ।’ टिटेले भने, ‘जेसस पनि । हामी डेभिड नेरेस र मार्टिनेलीको बारेमा कुरा गर्दैछौं । धेरै गाह्रो छ ।’

लिभरपुलका तीन खेलाडी एलिसन, फाविन्हो र रोबर्टाे फिर्मिनो टोलीमा परेका छन् । म्यानचेस्टर युनाइटेडका फ्रेड, एन्टोनी र क्यासमिरो पनि टोलीमा छन् । टोटेनहमका रिचार्लीसन, वेस्ट ह्यामका लुकास पाक्वेटा, न्यू क्यासलका ब्रुनो गुइमारेस, म्यानचेस्टर सिटीका इडर्सन र चेल्सीका थियागो सिल्भा ब्राजिलको टोलीमा अटाएका छन् ।

पाँच पटकको विश्व विजेता ब्राजिलले सेप्टेम्वर २३ मा घानासँग फ्रान्सको ले हाभ्रेमा र त्यसको चार दिनपछि पार्क डेस प्रिन्सेससमा ट्युनिसियासँग अन्तर्राष्ट्रिय मैत्रीपूर्ण खेल खेल्नेछ । कतारमा हुने विश्वकप अघि ब्राजिलको यो अन्तिम तयारी खेल हो ।

विश्वकपमा ब्राजिल क्यामरुन, सर्विया र स्वीट्जरल्यान्ड रहेको समूह ‘जी’ मा रहेको छ । समूह ‘एच’ मा पोर्चुगल, दक्षिण कोरिया, उरुग्वे र घाना रहेको छ । विश्वकप नोभेम्वर २० देखि डिसेम्वर १८ सम्म कतारमा हुँदैछ ।

ब्राजिली टोली
गोलकिपर – एलिसन, इडर्सन र वेभर्टन
डिफेन्डर – डानिलो, एलेक्स सान्द्रो, एलेक्स टेलास, ब्रेमेर, इडर मिलिसाओ, मार्किन्हस, इवानेज र थियागो सिल्भा
मिडफिल्डर – ब्रुनो गुइमारेस, क्यासमिरो, फाविन्हो, फ्रेड, लुकास पाक्वेटा र एभर्टन रिवेइरो
फरवार्ड – एन्टोनी, रोबर्टाे फिर्मिनो, म्याथिअस कुन्हा, नेयमार पेड्रो, राफिन्हा, रिचार्लीसन, भिनिसियस जुनियर र रोड्रिगो