काठमाडौं (हाम्रो खेलकुद) – नेपाली यू-२० राष्ट्रिय फुटबल टोलीका प्रशिक्षक मेघराज केसीले एएफसी यू-२० च्याम्पियनसिपमा भुटानविरुद्धको हार स्वीकारयोग्य नरहेको बताएका छन् ।

बहराइनको खलिफा स्पोर्ट्स रंगशालामा शनिबार भएको खेलमा भुटानले नेपाललाई २-० ले हराएको हो । भुटानले दुवै हाफमा १-१ गोल गर्दै खेलमा जित हासिल गरेको हो । खेलपछि बोल्दै टोलीका प्रशिक्षक मेघराज केसीले भुटानविरुद्ध हार स्वीकार्न नसकिने बताएका हुन् ।

‘पक्कैपनि आजको खेल नतिजाको हिसाबमा नेपालले भुटानसँग हार्नु भनेको स्वीकार्न सक्ने त होइन । हामीले पनि स्वीकार्न सकेका छैनौं ।’

‘हामी बहराइनमा एकदिन अघि आइपुगेका हौं । यहाँको समय र मौसमसँग हामी भिज्न सकेनौं । खेलाडीहरु धेरैजना बिरामी पनि परे । खेलाडीहरुको जिउमा शक्ति नै नभएको जस्तो पनि भयो ।’

‘हामीले हिजो साँझ प्रशिक्षण पनि गर्यौं । नेपाली समयअनुसार रातको दुई बजेसम्म हामी बाहिर नै थियौं । हामी एक दिनमा नै समयसँग मिल्ने कुरा भएन ।’

‘समग्रमा त्यो सबै भन्दा पनि, हामीले भुटानसँग हरेको स्विकार्नुपर्छ । भुटान यो वातावरणमा सहज बनाउन १० दिन अघि आएको थियो । हामीले एउटा प्रशिक्षण सेसन पनि राम्रोसँग गर्न पाएनौं । तैपनि यो नतिजा स्वीकारयोग्य छैन ।’

एएफसी यू-२० छनोटमा अब नेपालले सोमबार कतारको सामना गर्नेछ । खेल नेपाली समयअनुसार रातको ११:४५ बजे हुनेछ । प्रशिक्षक केसीले टोलीको अवस्था हेरेर मात्र उक्त खेलबारे भन्न सकिने बताए । ‘आजको रात र भोलिको रात विश्राम छ । पर्सी खेल भएकाले अब खेलाडीले कसरि रिकभर गर्छन्, त्यसमा नै भर पर्छ,’ उनले भने ।

एएफसी यू-२० छनोटको यस समूहमा नेपाल र भुटानसँगै कतार, आयोजक बहराइन र बंगलादेश छन् । बंगलादेश साफ यू-२० मा उपविजेता बनेको थियो । साफमा नेपाल र बंगलादेशको खेल १-१ को बराबरीमा सकिएको थियो । एएफसी यू-२० मा सहभागी १० समूहबाट सबै शीर्ष टोली र उत्कृष्ट ५ दोस्रो स्थानको टोली अन्तिम चरणका लागि अघि बढ्नेछन् ।