काठमाडौं (हाम्रो खेलकुद) – छैटौं महिला साफ च्याम्पियनसिप अन्तरगत समूह चरणको अन्तिम खेलमा नेपालले श्रीलंकाविरुद्ध पहिलो हाफमा आरामदायी अग्रता बनाएको छ । नेपालले पहिलो हाफमा ४–० को अग्रता कायम गरेको हो ।

नेपालका लागि रश्मीकुमारी घिसिङ, सरु लिम्बु, अमृता जैशी र दीपा शाहीले गोल गरे । त्रिपुरेश्वस्थित दशरथ रंगशालामा सोमबार भएको खेलको पहिलो हाफमै आरामदायी अग्रता लिन सफल भयो । खेलको आठौं मिनेटमा अनिता बस्नेतको पेनाल्टी बक्स बाहिरको प्रहार गोलरक्षकले बचाइन् । लगत्तै नवौं मिनेटमा रश्मीकुमारी घिसिङको गोलबाट नेपालले सुरुवाती अग्रता लिन सफल भयो । हीरा कुमारी भुजेलको क्रसलाई रश्मीले हेडरमार्फत जाली चुमाइन् ।

११औं मिनेटमा सरु लिम्बुको गोलबाट नेपालले अग्रता दोब्बर पार्यो । उनले अमृता जैशीको क्रसलाई सरुले हेडरमार्फत जाली चुमाईन् । १७औं मिनेटमा अमृता जैशीले गोल गर्दै नेपाललाई ३–० ले अघि बढाइन् । उनले अनिता बस्नेतको कर्नरलाई हेडरमार्फत नै जाली चुमाइन् ।

२९औं मिनेटमा गोललाइन नजिकै नेपालले सुवर्ण अवसर पाएपनि रेखा पौडेल र अनिताबीच तालमेल नमिल्दा गोल निस्कन सकेन । ३५औं मिनेटमा अनिताको कर्नरमा हीराको प्रहार श्रीलंकाका गोलरक्षक योहानी विरसिंगेले बचाइन् । लगत्तै श्रीलंकाली डिफेन्डरको क्लिअरेन्स टप कर्नरमा लागेर फर्कदा नेपालले थप अग्रता बढाउन सकेन ।

३९औं मिनेटमा अनिता बस्नेतको फ्रिकिकलाई गोलरक्षकले नियन्त्रणमा लिइन् । ४२औं मिनेटमा श्रीलंकाले पहिलो आक्रमण बुन्दा नेपाली टोलीका गोलरक्षक तथा कप्तान एन्जिला तुम्बाप्पो सुब्बालाई कुनै खतरा भएन । इन्ज्युरी समयमा दीपा शाहीले गोल गर्दै नेपाललाई ४-० ले अघि बढाइन् । उनको राष्ट्रिय टोलीबाट यो पहिलो गोल हो ।

यस खेलमा सफलता या बराबरीले पनि नेपाल समूह ‘बी’ को विजेता बन्नेछ । भुटान सेमिफाइनलमा प्रवेश गरिसकेको छ ।