एजेन्सी – फ्रान्सेली क्लब पेरिस सेन्ट जर्मेन (पिएसजी) का अर्जेन्टिनी फरवार्ड लियोनेल मेस्सीले युइएफए च्याम्पियन्स लिगमा पोर्चुगिज फरवार्ड क्रिस्टियानो रोनाल्डोको कीर्तिमान तोडेका छन् ।

च्याम्पियन्स लिगको समूह चरणको दोस्रो खेलमा इजरायली क्लब मकावी हाइफामाथि ३–१ को पूनरागन जित निकालेको खेलमा एक गोल गर्दै उनले रोनाल्डोको कीर्तिमान तोडेका हुन् ।

सात पटकको बालोन डिओर विजेता मेस्सीले च्याम्पियन्स लिगमा ३९ फरक क्लबविरुद्ध गोल गर्ने खेलाडी बनेका हुन् । यसअघि रोनाल्डोले ३८ फरक क्लबविरुद्ध गोल गर्दै कीर्तिमान राखेका थिए । यस्तै ३५ वर्षीय मेस्सी च्याम्पियन्स लिगमा आफूले खेलेका सबै १९ राष्ट्रका क्लबविरुद्ध गोल गर्न सफल भएका छन् ।

यस्तै मेस्सीले च्याम्पियन्स लिगको लगातार १८औं सिजनमा गोल गर्ने अर्को कीर्तिमान पनि बनाएका छन् । उनले सन् २००५–०६ मा बार्सिलोनाको लागि च्याम्पियन्स लिगमा पहिलो गोल गरेका थिए । त्यसयताको सबै सिजनमा मेस्सी गोल गर्न सफल भएका छन् ।

स्पेनिस क्लब रियल म्याड्रिडका फ्रान्सेली फरवार्ड करिम बेन्जेमाले पनि लगातार १७ सिजन गोल गरेका छन् । चोटका कारण उनी केही साता मैदान बाहिर छन् । उनले अब हुने खेलमा गोल गरे उनी पनि लगातार १८औं सिजन गोल गर्र्ने खेलाडी बन्नेछन् ।

च्याम्पियन्स लिगमा सबैभन्दा धेरै गोल गर्ने कीर्तिमान ३७ वर्षीय रोनाल्डोकै नाममा छ । रोनाल्डोले १४० गोल गरेका छन् । दोस्रोमा रहेको मेस्सीले १२६ गोल गरेका छन् । यो सिजन रोनाल्डो रहेको म्यानचेस्टर युनाइटेडले च्याम्पियन्स लिगमा छैन । त्यसैले अन्य खेलाडीले रोनाल्डोको सर्वाधिक गोललाई कम गर्ने सम्भावना छ ।