काठमाडौं (हाम्रो खेलकुद)– अखिल नेपाल फुटबल संघ (एन्फा) ले नेपाल र बंगलादेशको राष्ट्रिय फुटबल टोलीबीच फिफा डेमा हुने अन्तर्राष्ट्रिय मैत्रीपूर्ण खेलका लागि तयारी अन्तिम चरणमा पुगेको जानकारी दिएको छ ।

दशरथ रंगशालामा असोज ११ गते साँझ ५ः३० बजे नेपाल र बंगलादेशबीच मैत्रीपूर्ण खेल हुने यसअघि नै तय भइरहेको छ । मैत्रीपूर्ण खेलका लागि एन्फाले झण्डै २ महिनादेखि राष्ट्रिय टोलीको प्रशिक्षण गराइरहेको छ । सो खेलका लागि एन्फाले प्रदीप हुमागाईलाई टोलीको कार्यवहाक मुख्य प्रशिक्षक नियुक्त गरेको थियो ।

एन्फाले बिहीबार आयोजित पत्रकार सम्मेलनमा प्रवक्ता सुरेश शाहले बंगलादेश टोली मैत्रीपूर्ण खेलको चार दिन अघि असोज ७ गते नेपाल आइपुग्ने जानकारी दिए । मैत्रीपूर्ण खेलका लागि झण्डै ४९ लाख रुपैयाँ खर्च हुने एन्फाको अनुमान छ । मैत्रीपूर्ण खेल हेर्नका लागि दर्शकका लागि एन्फाले भिआइपीतर्फ १ हजार र साधारण प्यारापिटतर्फ ५ सय रुपैयाँको टिकट दर तोकेको छ । एन्फाले मैत्रीपूर्ण खेलको संयोजक उपाध्यक्ष विराटजंग शाहीले तोकेको छ ।

नेपाल र बंगलादेशीच अहिले सम्म २३ खेल भएका छन् । जसमा नेपालले ७ खेल र बंगलादेशले १३ खेल जितेको छ । ३ खेल भने बराबरीमा भेट भएको छ । बंगलादेश सन् २००३ को साफ च्याम्पियन हो भने नेपाल पछिल्लो संस्करणमा फाइनल पुगेको थियो ।

प्रवक्ता शाहले खेलाडीलाई व्यस्त राख्नका लागि मैत्रीपूर्ण खेल आयोजना गर्न लागिएको र नेपाली टोलीले सफलता प्राप्त गर्नेमा आशावादी रहेको बताए । राष्ट्रिय टोली ५ महिनापछि खेल्ने तयारीमा रहेको छ । एसियन कप छनोटको अन्तिम खेल नेपालले असार ६ गते कुवेतमा खेलेको थियो ।

तत्कालिन प्रशिक्षक अब्दुल्ला अल्मुताइरीसँगको विवादका कारण त्यति बेला टोलीका नियमित खेलाडीमध्येका कप्तान किरण चेम्जोङ, रोहित चन्द, विमल घर्ती मगर, अन्जन विष्टलगायत ११ खेलाडी टोलीमा थिएनन् । यसपटक भने उनीहरुमध्ये कतिपय टोलीमा फर्केका छन् भने कति विदेश पुगेका छन् । नेपाल र बंगलादेशबीच २०७७ को चैतमा दशरथ रंगशालामा थ्री नेसन्स कपको फाइनल भएको थियो । जसमा नेपाली टोली २–१ ले विजयी भएको थियो ।