एजेन्सी – स्पेनिस ला लिगामा आज (आइतबार) राती सिजनको पहिलो ‘म्याड्रिड डर्बी’ मा प्रतिस्पर्धा हुँदैछ । अन्तर्राष्ट्रिय विश्राम अघि मड्रिड शहरका दुई प्रतिद्धन्द्धी एट्लेटिको म्याड्रिड र रियल म्याड्रिडबीच प्रतिस्पर्धा हुन लागेको हो ।

खेल एट्लेटिकोको मैदान वान्डा मेट्रोपोलिटानोमा नेपाली समयअनुसार राती १२ः४५ बजे हुनेछ । घरेलु मैदानमा हुने खेलमा एट्लेटिको रियललाई सिजनको पहिलो हार चखाउने योजनामा मैदान उत्रनेछ ।

औसतको सुरुवात गरेको एट्लेटिको ५ खेलबाट १० अंक जोडेर सातौं स्थानमा रहेको छ । रियल पाँचै जितसहित १५ अंक जोडेर शीर्षस्थानमा रहेको छ ।

लयमा रहेको रियलविरुद्ध मैदान उत्रदा एट्लेटिकोलाई चोटले पिरोल्नेछ । गोलरक्षक जान ओब्लाक टोलीमा फर्किएका छन् । थोमस लेमार र सर्जियो रिगुइलोन रियलविरुद्ध उत्रने छैनन् । स्टेफन साभिक र जोसे मारिया जिमिनेज पनि टोलीमा हुने छैनन् । जिमिनेजले लगातार तीन खेल गुमाउनेछन् ।

टोलीसँग यान्निक कारास्को, अल्भारो मोराटा, एन्टोइन ग्रिजमन, जोआओ फेलिक्स, म्याथिअस कुन्हा, सउल निग्वेज, रोड्रिगो डि पउल, कोकी, नाहुइल मोलिना, जियोफ्रे कोन्डोगविया, रेइनिल्डो, फिलिपे र एक्सेल विट्सेल रहेका छन् ।

एट्लेटिकोलाई अंक तालिका सुधार गर्नको लागि रियलविरुद्धको यो खेल महत्वपूर्ण छ । रियललाई पनि शीर्षस्थानमा उक्लन यस खेलमा जितको खाँचो छ ।

यता, रियल पनि एट्लेटिकोलाई हराउँदै पुनः शीर्षस्थानमा फर्कने लक्ष्यमा हुनेछ । बार्सिलोनाले शनिबार राति इल्चेलाई ३–० ले हराएर शीर्षस्थानमा उक्लिएको थियो । रियल पनि आफ्नो प्रमुख फरवार्ड करिम बेन्जेमा र मिडफिल्डर लुकास भास्क्वेज टोलीमा हुने छैनन् ।

टोलीसँग लयमा रहेका भिनिसियस जुनियर, रोड्रिगो, फेडरिको भाल्भेर्डे, टोनी क्रुस, एरोलिएन चुआमेनी, लुका मोड्रिच, फर्लान्ड मेन्डी, डेभिड अलाबा, एन्टोनियो रुडिगर, ड्यानी कार्भाजल र थिवाउट कोर्टुवा रहेका छन् ।

यि दुई टोलीबीचको पछिल्लो ४४ खेलको नतिजामा रियल १८ खेलमा विजयी भएको छ । एट्लेटिकोले १३ खेलमा सफलता हात पारेको छ । १३ खेल बराबरीमा सकिएको छ ।

पछिल्लो दुई खेलमा दुवै टोलीले समान एक जितेका छन् । पछिल्लो खेलमा एट्लेटिको १–० ले विजयी हुँदा त्यसभन्दा अघि रियल २–० ले विजय िभएको थियो ।