काठमाडौं (हाम्रो खेलकुद) – नेपाली पुरुष राष्ट्रिय फुटबल टोलीले अर्को साता खेल्ने अन्तर्राष्ट्रिय मैत्रीपूर्ण खेलका लागि टोली घोषणा गर्दा दुई खेलाडी पहिलो पटक राष्ट्रिय टोलीमा समावेश भएका छन् ।

विंगरद्वय ऋतिक खड्का र आशिष चौधरीले पहिलो पटक राष्ट्रिय टोलीमा स्थान बनाएका हुन् । नेपालले असोज ११ गते दशरथ रंगशालामा मैत्रीपूर्ण खेल खेल्नेछ । टोलीले पछिल्लो एक महिनादेखि खेलका लागि प्रशिक्षण गरिरहेको छ ।

पहिलो पटक टोलीमा परेका ऋतिकले ए डिभिजन लिगमा थ्री स्टार क्लबका लागि खेल्दै आएका छन् । यता आशिषले भने बी डिभिजन लिगमा चर्च ब्वाइज युनाइटेडलाई च्याम्पियन बनाउन महत्त्वपूर्ण भूमिका निर्वाह गरेका थिए ।

ऋतिक राइट विंगमा खेल्ने गर्दछन् । ब्रिगेड ब्वाइज क्लबका लागि ललित स्मृति यू-१८ लिगमा खेल्दै चम्किएका उनले त्यसपछि ब्रिगेड ब्वाइजका लागि पनि एक सिजन खेले । त्यसपछि प्रशिक्षक उर्जन श्रेष्ठले थ्री स्टार आएपछि ऋतिकलाई पाटने क्लबमा ल्याएका थिए । उनले गत सिजन लिगको १३ खेल नै सुरुवात गर्दै ३ गोल गरेका थिए ।

यता आशिषले चर्च ब्वाइजका लागि बी डिभिजन लिगको १२ खेलमा ४ गोल गरेका थिए । बायाँ खुट्टा चलाउने उनी तीव्र गतिका लागि चिनिन्छन् । उनी बी डिभिजनको उत्कृष्ट खेलाडी पनि चुनिएका थिए । आशिषकै उच्च प्रदर्शनमा चर्च ब्वाइजले ए डिभिजन लिगको यात्रा तय गरेको थियो ।

२३ सदस्यीय टोली :

गोलरक्षक: किरण चेम्जोङ, विशाल श्रेष्ठ, दीप कार्की, विकेश कुथु

डिफेण्डर: रोहित चन्द, अनन्त तामाङ, विकास तामाङ, विकास खवास, दीनेश राजवंशी, सुमन अर्याल, रन्जित धिमाल

मिडफिल्डर: सुदिप गुरुङ, तेज तामाङ, सेसेहाङ आङदम्बे, विशाल राई, सुजल श्रेष्ठ, सुरज ज्यु ठकुरी, एरिक विष्ट

फरवार्ड: विमल घर्ती मगर, अन्जन विष्ट, ऋतिक खड्का, मनिष डाँगी र आशिष चौधरी

यो पनि :

राष्ट्रिय टोलीबाट बाहिरिए यू-२० कप्तान आयुष, कारण यस्तो