एजेन्सी – इंग्लिस प्रिमियर लिगको म्यानचेस्टर डर्वीमा म्यानचेस्टर सिटीले सानदार जित निकालेको छ । घरेलु मैदान इतिहाद स्टेडियममा म्यानचेस्टर सिटीले म्यानचेस्टर युनाइटेडमाथि ६–३ को सानदार जित निकालेको हो ।

सिटीको जितमा एर्लिङ ब्राउट हालान्ड र फिल फोडेनले ह्याट्रिक पूरा गरे । युनाइटेडका एन्थोनी मार्सियले दुई तथा एन्टोनीले एक गोल गरे ।

गोलको वर्षा भएको खेलको आठौं मिनेटमा फिल फोडेनको गोलबाट सिटीले सुरुवाती अग्रता लिएको थियो । उनले बर्नाडो सिल्भाको पासमा गोल गरे । ३४औं मिनेटमा हालान्डले गोल गर्दै सिटीको अग्रता दोब्बर पारे । उनले केभिन डि ब्रुएनाको पासमा गोल गर्न सफल भएका थिए ।

३७औं मिनेटमा हालान्डले केभिन डि ब्रुएनाको पासमा व्यक्तिगत दोस्रो तथा टोलीका लागि तेस्रो गोल गर्दै सिटीलाई ३–० ले अघि बढाए । ४४औं मिनेटमा फिल फोडेनले व्यक्तिगत दोस्रो तथा टोलीका लागि चौथो गोल गरेपछि सिटी पहिलो हाफमा ४–० ले अघि बढ्यो ।

५६औं मिनेटमा एन्टोनीले गोल गर्दै खेललाई ४–१ को स्थितिमा ल्याए । उनले क्रिस्टियन एरिक्सनको पासमा गोल गर्न सफल भएका थिए । ६४औं मिनेटमा हालान्डले ह्याट्रिक पूरा गरेपछि सिटी खेलमा ५–१ ले अघि बढ्यो । उनले सर्जियो गोमेजको पासमा गोल गर्न सफल भएका थिए ।

७३औं मिनेटमा फिल फोडेनले हालान्डको पासमा गोल गरेपछि सिटी खेलमा ६–१ को आरामदायी स्थितिमा अघि बढ्यो । त्यसपछि एन्थोनी मार्सियलले दुई गोल गरेपनि युनाइटेडको हार टार्न सकेन ।

८४औ मिनेटमा मार्सियालले गोल गर्दै खेलाई ६–२ को स्थितिमा ल्याए । इन्ज्युरी समयको थप गरिएको पहिलो मिनेटमा मार्सियलले पेनाल्टीमा गोल गर्दै युनाइटेडलाई ६–३ को स्थितिमा ल्याएपनि थप गोल निस्कन नसक्दा सिटी विजयी हुन सफल भयो ।

यस जितसँगै सिटी ८ खेलबाट २० अंक जोडेर दोस्रो स्थानमा यथावत रहेको छ । सिटी शीर्षस्थानको आर्सनलसँग १ अंकले पछि छ । पराजित युनाइटेड ७ खेलबाट १२ अंक जोडेर छैटौं स्थानमा यथावत रहेको छ ।