एजेन्सी – लियोनल मेस्सी विश्व कपको उपाधि उचाल्ने अवसरको एक कदम मात्र पछि छन् । डेढ दशक भन्दा लामो खेल जीवनमा उनले जित्न बाँकी भनेको विश्व कप उपाधि मात्रै हो ।

व्यवसायिक फुटबलमा बार्सिलोनाका लागि सबै उपाधि जिताउँदा महत्त्वपूर्ण भूमिका निर्वाह गरेका मेस्सीले अर्जेन्टिनाका लागि पाँचौं विश्वकप खेलिरहेका छन् । उनले यो आफ्नो अन्तिम विश्वकप भएको यसअघि नै बताइसकेका छन् । अर्जेन्टिनाका लागि कोपा अमेरिका जितेका मेस्सीले विश्वकप जित्न सके भने उनको खेल जीवन थप लोभलाग्दो पक्कै हुनेछ ।

अर्जेन्टिना फुटबल टोलीका लागि उनले सबै खाले कीर्तिमान तोडिसकेका छन् । विश्वकपमा पनि अघिल्ला संस्करणमा भन्दा उनी यो पटक बढी प्रभावकारी देखिएका छन् । उनी टोलीको केन्द्र विन्दुमा छन् । कतार विश्वकपमा उनी सबैभन्दा प्रभावकारी खेलाडीका रुपमा चर्चामा छन् ।

यसअघि भन्दा बढी गोल

मेस्सीले यसपटक ६ खेल खेलिसक्दा ५ गोल गरेका छन् । ३ गोल पेनाल्टीबाट भएका हुन् । उनको विश्व कप गोल संख्या ११ पुगेको छ । उनले अर्जेन्टिनाका लागि विश्व कपमा यसअघि सर्वाधिक गोलकर्ता ग्याब्रिएल बाटिस्टुटा (१०) को कीर्तिमानलाई भंग गरिसकेका छन् । मेस्सीले सन् २०१४ को विश्व कपमा ४ गोल गरेका थिए । त्यति बेला फाइनलमा अर्जेन्टिना जर्मनीसँग पराजित भएको थियो ।

प्रदर्शनसँगै गोल पनि

गोलसँगै मेस्सीको प्रदर्शन पनि अब्बल रहेको छन् । पाँचौं पटक विश्वकप खेलिरहँदा उनी यसपटक सबैभन्दा प्रभावकारी भएको विश्वास गरिएको छ । यद्दपी अन्तिम परीक्षा भने मेस्सीले दिन बाँकी छ । विश्वकप जित्न नसकेको अवस्थामा आफू उत्कृष्ट खेलाडी बनेपनि मेस्सीका लागि त्यो खासै अर्थपूर्ण हुने छैन ।

नेतृत्वकर्ता

मेस्सीमा परिपक्वता पनि बेजोडको देखिएको छ । मैदानमा उनको नेतृत्व क्षमता प्रकट भइरहेको छ । यसअघि भन्दा उनी टोलीलाई नेतृत्व दिनमा बढी सफल देखिन्छन् । उनी आफ्नो टोलीलाई प्रेरित गरिहेका हुन्छन् । आफू समस्यामा पर्दा पनि उनी टोलीको हौसला बढाउन चुक्दैनन् । नेदरल्यान्ड्सविरुद्धको क्वार्टरफाइनल त्यसको एउटा उदाहरण हो ।

धेरै एसिस्ट

मेस्सीले ६ खेलमा ३ एसिस्ट पनि दिइसकेका छन् । त्यसमध्ये क्रोएसियनविरुद्धको सेमिफाइनलको अन्तिम गोलमा उनले दिएको पासको खुबै चर्चा भइरहेको छ । उनले मेहनत र चलाखीपूर्ण तरिकाले निकालेको पासमा जुलियन अल्भारेजले सहर्ज गोल गरेका थिए ।

समग्रमा विश्व कपमा त्यो उनको आठौं एसिस्ट हो । जुन विश्व कपमा डिएगो म्यारोडोनाले राखेको कीर्तिमानसँग बराबर हो । आइतबार फ्रान्सविरुद्ध हुने फाइनलमा उनले त्यो कीर्तिमानलाई पनि भंग गर्ने अवसर हुनेछ ।

परिपक्वता

मेस्सीले विश्व कपमा टोलीको हरेक खेलपछि सञ्चारकर्मीलाई प्रतिक्रिया दिँदै आएका छन् । साउदी अ‍ेरेबियासँग पहिलो खेलमा पराजित भएयताका सबै खेलपछि उनी प्रतिक्रियाका लागि उपस्थित हुने गरेका छन् । जहाँ उनको सहज रुपमा प्रस्तुत हुने गरेको बताइन्छ । त्यसबाट पनि उनको परिपक्कवता झल्किएको छ ।

शारीरिक क्षमता

‘म लामो किक हान्न र बलको पछि धेरै दौडन सक्दिन । म ३५ वर्षको भइसकेको छु । त्यसैले मैले चलाख हुनुपर्छ,’ मेस्सीले हालै भनेका थिए । उमेरका कारण पनि मेस्सीलाई आफ्नो सिमितता थाहा छ ।

उमेर अनुसार शरीरको व्यवहार पनि फरक हुन्छ नै । त्यसलाई राम्ररी बुझेका मेस्सी बलका पछाडि दौडने भन्दा पनि बल आफूले पाएपछि त्यसलाई कसरी अघि बढाउने भन्नेमा बढी केन्द्रित देखिन्छन् ।

जितपछि दृढ

विश्व कप जित्ने मेस्सीका लागि यो अर्को मौका हुनेछ । उपाधिको निर्णय हुनुअघि विश्व कपमा सर्वाधिक खेल खेल्ने खेलाडीको नाममा मेस्सीले अर्को कीर्तिमान बनाउने छन् । फ्रान्सविरुद्धको खेल उनका लागि २६ औं खेल हो ।

जुन जर्मनीका लुथर म्याथुजको कीर्तिमानलाई उनले भंग गर्नेछन् । त्यस्तै उनले विश्व कपमा सर्वाधिक धेरै मिनेट खेल्ने कीर्तिमान बनाउन सक्नेछन् । इटालीको पाउलो माल्दिनीको नाममा २२ सय १७ मिनेट छ । मेस्सीले अहिले सम्म २१ सय ९४ मिनेट खेलिसकेका छन् ।

टोलीका लागि पहिलो गोल

मेस्सीको गोल संख्यात्मक रुपमा मात्र होइन टोलीका लागि उत्तिकै महत्वपूर्ण पनि रहेका छन् । ६ खेलमा उनले ५ गोल गरिसकेका छन् । त्यसमध्येपनि ४ गोल भने टोलीका लागि उनको पहिलो रहँदै आएको छ । यद्दपी साउदीविरुद्ध उनले पहिलो गोल गरेपनि टोली पराजित भएको थियो ।

समर्थकसँगको सम्बन्ध

अर्जेन्टिनी समर्थकसँग उनको हार्दिक सम्बन्ध रहनेगरेको छ । टोलीको जित, हार होस सबैमा उनलाई समर्थकले साथ दिरहेका हुन्छन् । तर, जारी विश्व कपमा जसरी उनी समर्थकसँग जसरी खुसी साटिरहेका छन्, सायद यसअघि त्यस्तो दृश्य देखिएको थिएन ।

केन्द्रबिन्दुमा मेस्सी

विश्वको सञ्चारमाध्यममा यति बेला मेस्सी केन्द्रबिन्दुमा छन् । यद्दपी यो पनि सत्य हो सबैले विश्व कप मेस्सीले नै जितोस् भन्ने चाहेका छन् । तर, सबैले उनको खेल जीवनको भने प्रशंसा गर्छन् नै । डेढ दशक भन्दा लामो खेल जीवनमा उनले जादुमयी प्रदर्शन गरेका छन् । ३५ वर्षको उमेरमा पनि उनको खेलमा उत्तिकै जादु छ । त्यसले कसलाई पनि मोहित पार्दैन र ?