दिपेश तिमल्सिना
सिलगुढी (भारत)– छ बर्षे महिला साफ च्याम्पियनसिपमा नेपाल पहिलो पटक सेमिफाइनलबाट बाहिरिएको छ । कञ्चनजंघा रंगशालामा आयोजक भारतसँग ३–१ ले हारेसँगै च्याम्पियनसिपमा नेपालको यात्रा अन्तिम चारबाटै टुंगिएको हो । यसअघि तीनैं संस्करणमा नेपाल फाइनलमा पुगेको थियो । तीनै पटक भारतले नेपाललाई फाइनलमा हराएको थियो ।

पहिलो हाफको एक मिनेट बाँकी रहँदा अग्रता लिएको भारतले दोस्रो हाफमा थप २ गोल गर्दा नेपालले पेनाल्टीमार्फत एक गोल फर्काएको थियो । पहिलो हाफका लागि एक मिनेट बाँकी रहँदा कमलादेवीले नेपालविरुद्ध गोल गरेकी थिइन् । रक्षक मनीष पानाले मैदानको मध्यभागमा निकालेको पासलाई अघि बढाउँदै कमलाले पेनाल्टी बक्सको दायाँ पट्टिबाट गरेको प्रहार सिधै गोलमा परिणत भएको थियो ।

५८ औं मिनेटमा इन्दुमतीले कमजोर रक्षापक्तिको फाइदा उठाउँदै दोस्रो गोल गरेकी थिइन् । दुई रक्षकलाई कटाएर इन्दुमतीले गोलकिपर अघि बढेको मौका छोप्दै चिप गर्दा गोल भएको थियो । ७६ औं मिनेटमा नेपालले पेनाल्टीमा गोल फर्काउँदै खेलमा फर्कने संकेत गरेको थियो ।

भारतीय खेलाडीको पेनाल्टी बक्समा ह्यान्ड भएपछि नेपालले पेनाल्टी पाएको थियो । पेनाल्टीमा सवित्रा भण्डारीले गोल गरिन् । च्याम्पिनसिपमा सावित्राको त्यो १२ औं गोल थियो । खेल सकिन ६ मिनेट बाँकी रहँदा सुस्मिता मलिकले गोल गरेपछि खेलमा फर्कने नेपालको सम्भावना समाप्त भएको थियो । सुस्मिताले कर्नरमा गोल गरेकी थिइन् ।